آبنائے ہرمز کی بحالی کیلئے عمان کی ثالثی میں خلیجی اور ایرانی وزرائے خارجہ کی ملاقات طے

خلیجی وزرائے خارجہ آئندہ ہفتے اپنے ایرانی ہم منصب سے ملاقات کریں گے تاکہ آبنائے ہرمز میں تجارتی جہاز رانی کی بحالی کا معاہدہ طے کیا جا سکے۔

عمان کی کوششوں کے تحت خلیجی وزرائے خارجہ آئندہ ہفتے اپنے ایرانی ہم منصب سے ملاقات کی تیاری کر رہے ہیں تاکہ آبنائے ہرمز کے ذریعے تجارتی جہاز رانی کا معاہدہ طے پا سکے۔

فنانشل ٹائمز کی رپورٹ کے مطابق اجلاس پیر کے روز عمانی ساحلی شہر صلالہ میں منعقد ہوگا اور اس حوالے سے دو باخبر افراد نے تصدیق کی ہے کہ کئی ریاستوں نے اس ملاقات پر اتفاق کر لیا ہے۔

ملاقات کا مقصد آبنائے ہرمز کے ذریعے جہاز رانی کے عارضی انتظام کے لیے معاہدے کی حمایت حاصل کرنا ہے، کیونکہ اس شپنگ چینل کے ذریعے تیل کے بہاؤ میں بڑے پیمانے پر رکاوٹیں پیدا ہو چکی ہیں۔

یہ بھی پڑھیں : ایرانی پاسداران انقلاب کا آبنائے ہرمز میں امریکی بحری ڈرون تباہ کرنے کا دعویٰ

اگست کے مہینے میں ایران اور عمان نے اشارہ دیا تھا کہ وہ ہرمز کے ذریعے جہاز رانی دوبارہ شروع کرنے کے معاہدے کے قریب ہیں، تاہم اس کسی بھی معاہدے کے لیے امریکی منظوری درکار ہوگی کیونکہ واشنگٹن نے ایران پر بحری ناکہ بندی برقرار رکھی ہوئی ہے۔

واشنگٹن نے بڑی حد تک اس معاہدے کی مخالفت کی ہے، جس میں امریکا شامل نہ ہو اور دوسرے خلیجی ممالک کو بھی ایران کے ساتھ مذاکرات کرنے سے خبردار کیا ہے۔

جنگ سے پہلے اس چینل کے ذریعے دنیا کے تیل کا تقریبا 20 فیصد حصہ فراہم کیا جاتا تھا، جبکہ سپلائی میں مزید رکاوٹوں کے خدشات کی وجہ سے تیل کی قیمتوں میں تیزی سے اضافہ ہو چکا ہے۔