ایران اور عراق جانے والے زائرین کیلئے نیا آن لائن رجسٹریشن سسٹم متعارف

پاکستان سے ایران اور عراق کے مقدس مقامات کی زیارت پر جانے والے زائرین کے لیے وزارتِ مذہبی امور و بین المذاہب ہم آہنگی نے نیا آن لائن رجسٹریشن سسٹم متعارف کروا دیا ہے۔

وزارت کی جانب سے جاری اعلامیے کے مطابق نئی زیارت پالیسی 2026 کے تحت زیارت گروپ آرگنائزرز (ZGOs) کے لیے باقاعدہ زیڈ جی اوز پورٹل شروع کر دیا گیا ہے۔ اس پورٹل کے ذریعے صرف رجسٹرڈ گروپ آرگنائزرز ہی زائرین کی بکنگ اور سفری انتظامات انجام دے سکیں گے۔ غیر رجسٹرڈ افراد یا کمپنیاں اس نظام کے تحت کسی بھی قسم کی بکنگ کرنے کی مجاز نہیں ہوں گی۔

اعلامیے میں بتایا گیا ہے کہ وزارتِ مذہبی امور نے ابتدائی مرحلے میں ملک بھر سے 262 زیارت گروپ آرگنائزرز کو رجسٹرڈ کیا ہے۔ یہ تمام آرگنائزرز مقررہ قواعد و ضوابط کے مطابق خدمات انجام دیں گے۔ زائرین کو ہدایت کی گئی ہے کہ وہ سفر کی منصوبہ بندی سے پہلے رجسٹرڈ آرگنائزرز کی فہرست ضرور دیکھیں تاکہ محفوظ اور مستند سروس حاصل کی جا سکے۔

وزارت نے واضح کیا ہے کہ رجسٹرڈ زیارت گروپ آرگنائزرز کی مکمل فہرست اس کی سرکاری ویب سائٹ پر دستیاب ہے۔ زائرین اپنی ضرورت اور سہولت کے مطابق کسی بھی رجسٹرڈ آرگنائزر کا انتخاب کر سکتے ہیں۔ اس نظام کا مقصد بکنگ کے عمل کو آسان بنانا اور غیر معیاری یا غیر قانونی سروس فراہم کرنے والوں کی حوصلہ شکنی کرنا بھی ہے۔

حکام نے زائرین کو سختی سے مشورہ دیا ہے کہ وہ کسی غیر مجاز فرد، ایجنٹ یا غیر رجسٹرڈ کمپنی کے ذریعے بکنگ نہ کروائیں۔ وزارت نے خبردار کیا ہے کہ اگر کوئی شخص غیر رجسٹرڈ ادارے سے لین دین کرتا ہے اور اسے کسی قسم کا مالی یا انتظامی نقصان پہنچتا ہے تو اس کی ذمہ داری وزارت پر عائد نہیں ہوگی۔