ایران جنگ کے اثرات، یورپی معیشت دباؤ کا شکار، توانائی بحران کے خدشات بڑھ گئے

ایران کے خلاف حالیہ امریکی و اسرائیلی جارحیت کے بعد یورپی یونین کی معیشت کو بڑھتے ہوئے معاشی دباؤ کا سامنا ہے۔

یورپی یونین کے 27 رکن ممالک کے وزرائے خزانہ خطے پر پڑنے والے اقتصادی اثرات کا جائزہ لے رہے ہیں، تاہم وہ اس تنازع کو "غیر قانونی جنگ” قرار دینے سے گریز کر رہے ہیں۔

یورپی حکام کے مطابق امریکہ اور ایران کے درمیان بڑھتی کشیدگی کا براہِ راست اثر عالمی معیشت، خصوصاً توانائی کی منڈیوں اور تجارتی راستوں پر پڑ رہا ہے۔

فرانس کے وزیرِ معیشت رولان لیسکیور نے کہا کہ آبنائے ہرمز عالمی معیشت کے لیے ایک اہم اقتصادی مرکز بن چکی ہے اور صورتحال کا حل ہونا یورپی معیشت کے لیے انتہائی اہم ہے۔

انہوں نے کہا کہ اگرچہ یورپ ایشیائی ممالک کے مقابلے میں اس بحران سے نسبتاً کم متاثر ہے، تاہم توانائی کی بلند قیمتوں اور معاشی غیر یقینی صورتحال کے اثرات پہلے ہی محسوس کیے جا رہے ہیں۔

یورپی یونین کو موسم سرما سے قبل توانائی کے تحفظ کے حوالے سے بھی خدشات لاحق ہیں۔

تجزیہ کاروں کے مطابق عالمی سپلائی چین، تیل و گیس کی قیمتوں اور توانائی کی منڈیوں میں پیدا ہونے والی بے یقینی کی بڑی وجہ خطے میں جاری کشیدگی ہے۔

دوسری جانب یورپی یونین میں مہنگائی کی شرح اب بھی بلند سطح پر برقرار ہے جبکہ بلند شرح سود کے باعث گھریلو صارفین اور کاروباری اداروں پر مالی دباؤ بڑھ رہا ہے۔

یورپی یونین کے شماریاتی ادارے یورو اسٹیٹ کے تازہ اعداد و شمار کے مطابق یونین بھر میں تقریباً 7 کروڑ 24 لاکھ افراد غربت کے خطرے سے دوچار ہیں۔

ماہرین کے مطابق بڑھتے ہوئے اخراجاتِ زندگی کے باعث کئی ایسے افراد بھی مشکلات کا شکار ہیں جو مستقل روزگار رکھتے ہیں۔

اقتصادی بحران کے حوالے سے ناقدین کا کہنا ہے کہ خطے میں پیدا ہونے والی غیر یقینی صورتحال کا تعلق مشرقِ وسطیٰ کی پالیسیوں سے ہے۔

یورپی یونین کے اداروں کے باہر مظاہرین نے اسرائیل کو جواب دہ قرار دینے اور بالخصوص غزہ میں ہونے والی کارروائیوں پر احتجاج کیا۔

مظاہرین کا مؤقف ہے کہ یورپی یونین اور اسرائیل کے درمیان تجارتی و تحقیقی تعاون کے معاہدوں پر نظرثانی کی ضرورت ہے۔

ان کے مطابق ایسے تعلقات جاری رکھنا خطے میں جاری تنازعات کے تناظر میں قابلِ سوال ہیں۔

یورپی کمیشن کے معیشت اور پیداواری امور کے کمشنر ویلڈس ڈومبرووسکس نے کہا کہ حالیہ دنوں میں دوبارہ بڑھنے والی کشیدگی کے باعث تیل اور گیس کی قیمتوں میں اضافہ ہوا ہے۔

انہوں نے کہا کہ کمیشن صورتحال اور اس کے معاشی اثرات، خصوصاً اقتصادی ترقی اور مہنگائی پر اثرات کی مسلسل نگرانی کر رہا ہے۔

تاہم لاکھوں یورپی شہریوں کے لیے یہ معاملہ صرف معاشی اعداد و شمار تک محدود نہیں بلکہ روزمرہ زندگی میں بڑھتے ہوئے اخراجات اور مالی مشکلات کی صورت میں سامنے آ رہا ہے۔