زیارت شہداء کے لواحقین کا کوئٹہ میں دھرنا جاری، 17 جولائی کو ہڑتال کا اعلان

زیارت میں شہید ہونے والے پولیس اہلکاروں کے لواحقین کا کوئٹہ میں پانچویں روز بھی دھرنا جاری ہے، جس کی حمایت میں آل پارٹیز نے صوبہ گیر شٹر ڈاؤن ہڑتال کا اعلان کردیا۔

بلوچستان کے ضلع زیارت میں شہید ہونے والے پولیس اہلکاروں کے لواحقین کا احتجاجی دھرنا کوئٹہ کے کوئلہ پھاٹک پر پانچویں روز بھی مسلسل جاری رہا۔

اس دھرنے میں شہداء کے شدید غمزدہ اہلِ خانہ کے ساتھ ساتھ سیاسی و سماجی رہنماؤں، وکلاء، طلبہ اور مختلف مکاتبِ فکر سے تعلق رکھنے والے افراد نے بہت بڑی تعداد میں شرکت کی۔

مظاہرین نے زیارت واقعے میں ملوث تمام دہشتگرد عناصر کی فوری گرفتاری، معاملے کی شفاف تحقیقات اور شہداء کے معصوم لواحقین کو فوری انصاف فراہم کرنے کا پرزور مطالبہ کیا ہے۔

شرکاء کا صاف کہنا تھا کہ جب تک ان کے تمام جائز مطالبات تسلیم نہیں کیے جاتے، ان کا یہ پرامن احتجاجی دھرنا اسی طرح جاری رہے گا۔ دھرنے کے شرکاء نے حکومت سے مطالبہ کیا کہ شہداء کے خاندانوں کو تحفظ، مالی معاونت اور انصاف کی فراہمی کو یقینی بنایا جائے تاکہ مستقبل میں ایسے خونی واقعات کی روک تھام ہو سکے۔

یہ بھی پڑھیں : سانحہ کچ مانگی کے خلاف زیارت کے عوام سڑکوں پر نکل آئے، دہشتگردوں کے خلاف ریلی

دوسری طرف زیارت دھرنے کی حمایت میں آل پارٹیز کا ایک اہم اجلاس منعقد ہوا، جس میں آئندہ کا سخت احتجاجی شیڈول جاری کر دیا گیا ہے۔

اجلاس کے فیصلوں کے مطابق 15 جولائی بروز بدھ کو ژوب، ہرنائی، چمن، تربت، گوادر اور پنجگور میں سڑکوں پر عظیم الشان احتجاجی مظاہرے منعقد کیے جائیں گے۔

اس کے بعد 16 جولائی کو دھرنے کے مقام پر خواتین اور معصوم بچوں کی بھرپور شرکت کو یقینی بنایا جائے گا، جبکہ 17 جولائی کو پورے بلوچستان میں مکمل صوبہ گیر شٹر ڈاؤن ہڑتال کی جائے گی۔

آل پارٹیز شہدائے زیارت لواحقین دھرنا کمیٹی نے حکومت کو واضح پیغام دیا ہے کہ شہدائے زیارت کے لواحقین کے مطالبات کی منظوری اور انصاف کی مکمل فراہمی تک یہ احتجاجی تحریک اور دھرنا بدستور چلتا رہے گا۔