ہالی ووڈ کے سینئر اداکار ہال ولیمز 91 برس کی عمر میں انتقال کر گئے

ہالی ووڈ کے معروف اور تجربہ کار اداکار ہال ولیمز 91 برس کی عمر میں انتقال کر گئے۔

ہالی ووڈ اداکار کے منیجر زینا پورٹلاک ہیوسٹن کے مطابق ہال ولیمز 15 جولائی کی صبح امریکی ریاست کیلیفورنیا کے شہر رانچو میراج میں واقع اپنی رہائش گاہ پر طبعی وجوہات کے باعث انتقال کر گئے۔

ہال ولیمز 14 دسمبر 1934 کو امریکی ریاست اوہائیو کے شہر کولمبس میں پیدا ہوئے تھے۔ اداکاری کی دنیا میں قدم رکھنے سے پہلے انہوں نے پوسٹل ورکر اور جیل میں اصلاحی افسر (Correctional Officer) کے طور پر بھی خدمات انجام دیں۔ بعد ازاں 1968 میں وہ اپنے خواب کی تکمیل کے لیے ہالی ووڈ منتقل ہوئے، جہاں انہوں نے اداکاری کے میدان میں اپنی الگ شناخت بنائی۔

1970 کی دہائی میں ہال ولیمز نے متعدد کامیاب ٹی وی ڈراموں میں اداکاری کی۔ ان کے نمایاں منصوبوں میں The Jimmy Stewart Show اور That Girl شامل ہیں۔ تاہم انہیں اصل شہرت مقبول کامیڈی سیریز Sanford and Son میں محلے کے خوش اخلاق پولیس افسر آفیسر اسمیٹی (Officer Smitty) کے کردار سے ملی۔ اس کردار نے انہیں امریکی ٹیلی ویژن کے یادگار فنکاروں میں شامل کر دیا۔

بعد ازاں انہوں نے کئی مشہور ٹی وی سیریز میں بھی اہم کردار ادا کیے۔ ان میں The Waltons میں ہارلے فوسٹر، On the Rocks میں لیسٹر ڈی موٹ، اور Private Benjamin میں سارجنٹ ٹیڈ راس کے کردار خاص طور پر قابل ذکر ہیں۔ ہال ولیمز نے 1980 سے 1981 کے دوران Sanford اسپن آف سیریز میں بھی آفیسر اسمیٹی کا کردار دوبارہ نبھایا، جسے مداحوں نے بے حد پسند کیا۔

فلمی دنیا میں بھی ہال ولیمز نے اپنی صلاحیتوں کا لوہا منوایا۔ انہوں نے Herbie Rides Again، On the Nickel، The Rookie، The Cherokee Kid اور Guess Who سمیت کئی فلموں میں اداکاری کی۔ ان کے کردار ہمیشہ سادگی، قدرتی انداز اور مضبوط اداکاری کی وجہ سے پسند کیے گئے۔

ذاتی زندگی میں ہال ولیمز نے دو شادیاں کیں، تاہم دونوں کا انجام طلاق پر ہوا۔ ان کے انتقال کے بعد ان کے تین بچے سوگوار ہیں۔