سیکیورٹی فورسز کی وانا میں بروقت کارروائی، دہشتگردی کی بڑی کوشش ناکام

سیکیورٹی فورسز نے جنوبی وزیرستان لوئر کے علاقے وانا (غواخوا) میں انٹیلی جنس بنیادوں پر بروقت کارروائی کرتے ہوئے دہشتگردی کی ایک بڑی کوشش ناکام بنا دی۔

سیکیورٹی ذرائع کے مطابق فورسز نے بارودی مواد سے بھری ایک گاڑی کو خودکش حملے سے پہلے ہی نشانہ بنا کر تباہ کر دیا، جسے کسی بڑے دہشتگرد حملے کے لیے استعمال کیا جانا تھا۔

ذرائع کے مطابق سیکیورٹی فورسز نے مذکورہ گاڑی کی مسلسل تین روز تک نگرانی کی اور اسے آبادی سے دور لے جانے کے بعد کارروائی کی، تاکہ شہریوں کی جان و مال کو کسی بھی نقصان سے محفوظ رکھا جا سکے۔

کارروائی کے دوران سیکیورٹی فورسز نے پیشہ ورانہ مہارت کا مظاہرہ کرتے ہوئے علاقے کو ممکنہ تباہی سے بچایا۔

سیکیورٹی ذرائع کے مطابق کامیاب آپریشن میں بارود سے بھری گاڑی اور ایک موٹر سائیکل تباہ کر دی گئی، جبکہ ایک دہشتگرد ہلاک اور پانچ زخمی ہوئے۔

سیکیورٹی فورسز کا کہنا ہے کہ دہشتگردی کے خلاف جاری کارروائیوں کا مقصد ملک میں امن و امان کا قیام اور شہریوں کا تحفظ یقینی بنانا ہے۔