سرکاری ملازمین کیلئے غیر ملکی شہریت سے متعلق نئی شرط عائد

وفاقی حکومت نے سول سرونٹس کے لیے غیر ملکی شہریت اور سفری دستاویزات سے متعلق معلومات فراہم کرنے کا عمل مزید سخت کر دیا ہے۔

 نئے قواعد کے تحت تمام سرکاری ملازمین کو غیر ملکی شہریت، پاسپورٹ اور دیگر متعلقہ دستاویزات کے بارے میں حلفیہ ڈیکلریشن جمع کروانا ہوگا۔ اس اقدام کا مقصد سرکاری ملازمین کے غیر ملکی روابط اور شہریت سے متعلق ریکارڈ کو واضح اور اپ ڈیٹ رکھنا ہے۔

اسٹیبلشمنٹ ڈویژن نے اس حوالے سے لازمی ڈیکلریشن فارم جاری کر دیے ہیں۔ یہ فارم سول سرونٹس کی غیر ملکی شہریت سے متعلق رولز 2026 کے تحت متعارف کروائے گئے ہیں۔ نئے نظام کے تحت سرکاری ملازمین کو اپنی غیر ملکی شہریت اور سفری دستاویزات کی تفصیلات مقررہ طریقہ کار کے مطابق فراہم کرنا ہوں گی۔

نئے قواعد کے مطابق سرکاری ملازمین کو غیر ملکی شہریت سے متعلق معلومات تین اہم مواقع پر دینا ہوں گی۔ ملازمت میں شمولیت کے وقت متعلقہ معلومات فراہم کرنا لازمی ہوگا۔ اس کے علاوہ ہر سول سرونٹ کو سالانہ بنیاد پر بھی ڈیکلریشن جمع کروانا ہوگا۔ اس عمل کے ذریعے سرکاری ریکارڈ میں موجود معلومات کو باقاعدگی سے اپ ڈیٹ رکھنے کی کوشش کی جائے گی۔

ڈیکلریشن میں صرف غیر ملکی شہریت ہی نہیں بلکہ غیر ملکی پاسپورٹ، رہائشی اجازت نامے، مستقل رہائش کے کارڈ اور دیگر سفری یا قانونی دستاویزات کی تفصیلات بھی شامل ہوں گی۔ سرکاری ملازمین کو اپنی تمام متعلقہ معلومات مکمل طور پر فراہم کرنا ہوں گی تاکہ ریکارڈ میں کسی قسم کا ابہام باقی نہ رہے۔

نئے ضوابط میں سرکاری ملازمین کے زیر کفالت افراد کو بھی شامل کیا گیا ہے۔ اگر کسی ملازم کے زیر کفالت خاندان کے کسی فرد کے پاس غیر ملکی شہریت ہے تو اس کی معلومات بھی ڈیکلریشن میں دینا ضروری ہوگی۔ اسی طرح اگر کسی سرکاری ملازم نے کسی غیر ملکی شہری سے شادی کی ہے تو اسے شادی اور متعلقہ سرکاری اجازت کی تفصیلات بھی ظاہر کرنا ہوں گی۔

حکومت نے یہ بھی واضح کیا ہے کہ اگر کسی ملازم کی غیر ملکی شہریت یا سفری دستاویزات سے متعلق معلومات میں بعد میں کوئی تبدیلی آتی ہے تو اسے مقررہ مدت میں حکام کو آگاہ کرنا ہوگا۔ نئے قواعد کے تحت ایسی کسی بھی تبدیلی کی اطلاع 90 دن کے اندر متعلقہ حکام کو دینا ضروری قرار دیا گیا ہے۔

اسٹیبلشمنٹ ڈویژن کے مطابق ملازمت میں شمولیت کے وقت اہم معلومات چھپانے والے ملازمین کے خلاف کارروائی کی جا سکتی ہے۔ اسی طرح غلط، نامکمل یا جھوٹا ڈیکلریشن جمع کروانے کی صورت میں بھی محکمانہ اور قانونی کارروائی کا سامنا کرنا پڑ سکتا ہے۔