معروف اداکار اور موسیقار خالد نظامی انتقال کر گئے

پاکستانی شوبز انڈسٹری کے معروف اداکار، کامیڈین اور موسیقار خالد نظامی طویل علالت کے بعد کراچی میں انتقال کر گئے۔

اہل خانہ کے مطابق خالد نظامی کافی عرصے سے علیل تھے اور زیر علاج تھے۔ انکی نماز جنازہ کل نماز ظہر کے بعد عثمانیہ مسجد، بفر زون 15 بی، کراچی وسطی میں ادا کی جائے گی۔ نماز جنازہ میں اہل خانہ، عزیز و اقارب، شوبز شخصیات اور مرحوم کے مداحوں کی شرکت متوقع ہے۔

خالد نظامی کا شمار اپنے دور کے نمایاں اداکاروں اور کامیڈینز میں ہوتا تھا۔ وہ 1947 میں شمالی بھارت کے شہر میسوری، ضلع ڈیرہ دون میں پیدا ہوئے۔ قیام پاکستان کے بعد انہوں نے کراچی میں تعلیم حاصل کی۔ ابتدائی تعلیم کراچی گرامر اسکول سے حاصل کی، جبکہ بعد میں اسلامیہ کالج کراچی سے بیچلر کی ڈگری مکمل کی۔

خالد نظامی نے اداکاری کے میدان میں اپنی الگ پہچان بنائی۔ ان کا انداز سادہ اور فطری تھا۔ برجستہ مزاح اور جاندار کرداروں کی وجہ سے انہیں ناظرین میں خاص مقبولیت حاصل ہوئی۔ وہ مزاحیہ کرداروں کے ساتھ سنجیدہ کردار بھی مؤثر انداز میں ادا کرنے کی صلاحیت رکھتے تھے۔

پی ٹی وی کے مشہور ڈرامے ’انکل عرفی‘ نے انہیں گھر گھر پہنچایا۔ 1972 میں نشر ہونے والے اس ڈرامے کے بعد ان کی مقبولیت میں نمایاں اضافہ ہوا۔ اس کے بعد 1974 کے ڈرامے ’شہزوری‘ اور 1982 کے مقبول ڈرامے ’ان کہی‘ میں بھی ان کی اداکاری کو پسند کیا گیا۔ حسینہ معین کے تحریر کردہ کھیل ’عید کا جوڑا‘ سمیت انہوں نے کئی دیگر ڈراموں میں بھی کام کیا۔

خالد نظامی نے صرف ٹیلی ویژن تک خود کو محدود نہیں رکھا بلکہ فلمی دنیا میں بھی اپنی صلاحیتوں کا مظاہرہ کیا۔ انہوں نے نذیر اسلام کی 1974 میں بننے والی فلم ’حقیقت‘ میں کام کیا۔ اس کے علاوہ 1975 کی فلم ’پہچان‘ اور 1977 کی پنجابی فلم ’اج دیاں کڑیاں‘ بھی ان کے فلمی کیریئر کا حصہ رہیں۔

اداکاری کے ساتھ خالد نظامی کو موسیقی سے بھی خاص شغف تھا۔ انہوں نے کئی گیتوں کی موسیقی ترتیب دی۔ گلوکارہ روبینہ بدر کی آواز میں مشہور گیت ’تم سنگ نیناں لاگے مانے نہ ہی جیا را‘ کی دھن بھی خالد نظامی نے ترتیب دی تھی۔ اس کام نے موسیقی کے میدان میں بھی ان کی صلاحیتوں کو نمایاں کیا۔