وفاقی سرکاری ملازمین کی تنخواہوں اور الاؤنسز پر وزارت خزانہ کی اہم وضاحت

وفاقی سرکاری ملازمین کی تنخواہوں اور ایڈہاک ریلیف الاؤنسز کے حوالے سے سامنے آنے والی مختلف خبروں کے بعد وزارت خزانہ نے اہم وضاحت جاری کردی ہے۔

وزارت خزانہ کے اعلامیے کے مطابق ایڈہاک ریلیف الاؤنس 2023 اور 2024 کی موجودہ شرحوں میں فی الحال کوئی مزید اضافہ نہیں کیا جائے گا۔ دونوں الاؤنسز اپنی موجودہ سطح پر برقرار رہیں گے۔ اس فیصلے کا اطلاق پہلے سے کام کرنے والے اور نئے بھرتی ہونے والے وفاقی ملازمین پر بھی ہوگا۔

اعلامیے میں بتایا گیا ہے کہ ایڈہاک ریلیف الاؤنس 2023 پہلے ہی 30 جون 2023 کی سطح پر منجمد ہے۔ آئندہ بھی یہ اسی شرح پر جاری رہے گا۔ نئے بھرتی ہونے والے ملازمین کو بھی یہ الاؤنس بنیادی پے اسکیل 2022 کی بنیاد پر دیا جائے گا۔

گریڈ 1 سے 16 تک کے وفاقی ملازمین کو بنیادی تنخواہ کا 35 فیصد ایڈہاک ریلیف الاؤنس 2023 ملے گا۔ دوسری جانب گریڈ 17 سے 22 تک کے افسران کے لیے اس الاؤنس کی شرح بنیادی تنخواہ کا 30 فیصد مقرر ہے۔ وزارت خزانہ کے مطابق یہ شرح آئندہ احکامات تک برقرار رہے گی۔

ایڈہاک ریلیف الاؤنس 2024 کے بارے میں بھی وزارت خزانہ نے صورتحال واضح کردی ہے۔ یہ الاؤنس بھی بنیادی پے اسکیل 2022 کی بنیاد پر دیا جائے گا۔ گریڈ 1 سے 16 تک کے ملازمین کو بنیادی تنخواہ کا 25 فیصد الاؤنس ملے گا، جبکہ گریڈ 17 سے 22 تک کے افسران کے لیے شرح 20 فیصد ہوگی۔

وزارت خزانہ کے مطابق ایڈہاک ریلیف الاؤنس 2024 بھی 30 جون 2026 کی سطح پر منجمد رہے گا۔ تاہم یکم جولائی 2026 یا اس کے بعد وفاقی ملازمت اختیار کرنے والے ملازمین کے لیے اس الاؤنس کا تعین بنیادی پے اسکیل 2024 کے مطابق کیا جائے گا۔

وزارت خزانہ نے خصوصی تنخواہوں اور ان سے منسلک متعلقہ الاؤنسز کے بارے میں بھی وضاحت کردی ہے۔ یہ ادائیگیاں بھی 30 جون 2026 کی سطح پر برقرار رہیں گی۔ آئندہ کوئی نیا حکم جاری ہونے تک ان میں تبدیلی نہیں کی جائے گی۔