آزاد کشمیر میں طلبہ کے لیے بڑی خوشخبری، گرمیوں کی چھٹیوں میں ایک ہفتے کی توسیع

آزاد جموں و کشمیر میں طلبہ و طالبات کے لیے بڑی خوشخبری آگئی، حکومت نے سمر زون کے تعلیمی اداروں میں موسم گرما کی تعطیلات میں مزید 4 روز کی توسیع کردی ہے، جس کے باعث طلبہ کو مجموعی طور پر ایک ہفتے کی اضافی چھٹی ملے گی۔

حکومت آزاد جموں و کشمیر کے محکمہ ایلیمنٹری اینڈ سیکنڈری ایجوکیشن کی جانب سے جاری نوٹیفکیشن کے مطابق سمر زون میں آنے والے تمام تعلیمی ادارے 10 اگست بروز پیر سے 13 اگست 2026 بروز جمعرات تک بند رہیں گے۔

نوٹیفکیشن کے مطابق 14 اگست بروز جمعہ پاکستان کے یوم آزادی کے موقع پر عام تعطیل ہوگی، جبکہ ہفتہ اور اتوار کو معمول کی ہفتہ وار تعطیلات ہوں گی۔

یوں موسم گرما کی تعطیلات میں توسیع کے باعث طلبہ و طالبات کو مسلسل ایک ہفتے کی اضافی چھٹیاں میسر آئیں گی۔

حکام کے مطابق تعطیلات میں توسیع کا اطلاق آزاد جموں و کشمیر کے سمر زون میں آنے والے سرکاری اور نجی دونوں تعلیمی اداروں پر ہوگا۔