امریکا ایران کشیدگی کے خاتمے کیلئے پاکستان کا کردار اہم، دنیا کی نظریں اسلام آباد پر مرکوز: اسٹمسن سینٹر

اسلام آباد: امریکا اور ایران کے درمیان جاری کشیدگی کے خاتمے اور دونوں ممالک کو دوبارہ مذاکرات کی میز پر لانے کے لیے پاکستان، قطر اور عمان کی سفارتی کوششیں عالمی توجہ حاصل کر رہی ہیں۔ امریکی تھنک ٹینک اسٹمسن سینٹر کی ایک حالیہ اشاعت میں پاکستان کے سفارتی کردار کو خاص طور پر نمایاں قرار دیا گیا ہے۔

اسٹمسن سینٹر کے تجزیے کے مطابق اسلام آباد میمورنڈم سمیت مختلف دباؤ اور پیچیدہ علاقائی حالات کے باوجود پاکستان امریکا اور ایران کو دوبارہ مذاکرات کی طرف لانے کے لیے اپنی سفارتی کوششیں جاری رکھے ہوئے ہے۔

تجزیے میں کہا گیا ہے کہ پاکستان اور قطر نے امریکا اور ایران کو جنگ بندی اور مذاکرات کی طرف واپس لانے کے لیے ایک مشترکہ تجویز بھی پیش کی، جس سے ظاہر ہوتا ہے کہ خطے میں کشیدگی کم کرنے کے لیے سفارتی راستے تلاش کیے جا رہے ہیں۔

اسٹمسن سینٹر کے مطابق ایرانی وزیر داخلہ کی حالیہ اسلام آباد آمد کو تہران کی جانب سے پاکستان کی ثالثی پر اعتماد کی علامت کے طور پر دیکھا جا رہا ہے۔ اس دورے نے دونوں ممالک کے درمیان جاری سفارتی رابطوں کو مزید اہمیت دی ہے۔

تجزیے میں بتایا گیا ہے کہ پاکستانی وزیر خارجہ کی جانب سے اپنے ایرانی ہم منصب کو اسلام آباد آنے کی دعوت بھی پاکستان کے اس عزم کی عکاسی کرتی ہے کہ وہ کشیدگی کم کرنے اور امن عمل کو آگے بڑھانے کے لیے سفارتی کوششیں جاری رکھنا چاہتا ہے۔

اسٹمسن سینٹر کے مطابق پاکستان امریکا اور ایران کے درمیان رابطے میں ایک ایسے فریق کا کردار ادا کر سکتا ہے جس پر دونوں جانب نسبتاً اعتماد موجود ہے۔ واشنگٹن کے ساتھ پاکستان کے دفاعی روابط، تہران کے ساتھ تاریخی تعلقات اور بیجنگ کے ساتھ قریبی تعلقات اسلام آباد کو خطے میں ایک منفرد سفارتی حیثیت فراہم کرتے ہیں۔

تجزیے میں مزید کہا گیا ہے کہ امریکا اور ایران دونوں کے ساتھ پاکستان کے تعلقات اسے موجودہ تنازع کے حل کے لیے ایک ممکنہ ثالث بناتے ہیں۔ پاکستان کی سفارتی طاقت محض حالات پر ردعمل دینے تک محدود نہیں بلکہ وہ مختلف فریقوں کو ایک دوسرے کے قریب لانے اور مذاکرات کا راستہ ہموار کرنے کی صلاحیت بھی رکھتا ہے۔

اسٹمسن سینٹر کی اشاعت کے مطابق موجودہ صورتحال میں پاکستان، قطر اور عمان کی سفارتی سرگرمیاں اس لیے اہم ہیں کہ یہ ممالک امریکا اور ایران کے درمیان براہِ راست رابطے اور مذاکرات کی بحالی کے لیے پل کا کردار ادا کر سکتے ہیں۔

تجزیے میں اس امر کی جانب بھی اشارہ کیا گیا ہے کہ اگر سفارتی کوششیں مؤثر ثابت ہوتی ہیں تو پاکستان کا کردار صرف موجودہ بحران کو کم کرنے تک محدود نہیں رہے گا بلکہ مستقبل میں امریکا اور ایران کے درمیان اعتماد سازی کے عمل میں بھی اسلام آباد کی اہمیت بڑھ سکتی ہے۔