پنجاب کے نوجوانوں کیلئے بڑی خوشخبری، پرواز کارڈ سے 10 لاکھ روپے تک بلاسود قرض

لاہور: پنجاب حکومت نے بیرونِ ملک روزگار کے خواہشمند نوجوانوں کے لیے پرواز کارڈ پروگرام متعارف کرا دیا ہے، جس کے تحت اہل افراد کو بیرونِ ملک ملازمت جوائن کرنے کے لیے درکار اخراجات پورے کرنے کی خاطر 3 لاکھ سے 10 لاکھ روپے تک بلاسود مالی معاونت فراہم کی جائے گی۔

یہ پروگرام بالخصوص ان نوجوانوں کے لیے اہم قرار دیا جا رہا ہے جنہیں بیرونِ ملک ملازمت کی پیشکش تو مل چکی ہے، لیکن ویزا، میڈیکل، فضائی ٹکٹ اور دیگر ضروری اخراجات کے لیے مالی وسائل دستیاب نہیں۔

پرواز کارڈ سے قرض کہاں خرچ کیا جاسکے گا؟

پرواز کارڈ کے تحت حاصل ہونے والی مالی معاونت بیرونِ ملک ملازمت سے متعلق مختلف ضروری اخراجات کے لیے استعمال کی جاسکے گی۔

اس میں ویزا فیس، میڈیکل اخراجات، پروٹیکٹوریٹ فیس، فضائی ٹکٹ، اسکل ویری فکیشن اور لائسنس یافتہ اوورسیز ایمپلائمنٹ پروموٹرز کی فیس شامل ہے۔

یعنی بیرونِ ملک ملازمت حاصل کرنے کے بعد صرف پیسوں کی کمی کے باعث سفر اور ملازمت میں تاخیر کا سامنا کرنے والے نوجوانوں کے لیے یہ اسکیم مالی رکاوٹ کم کرنے میں مدد دے سکتی ہے۔

کون نوجوان پرواز کارڈ کے لیے اہل ہوگا؟

سرکاری معلومات کے مطابق پروگرام کے لیے درخواست دینے والے امیدوار کا پنجاب کا مستقل رہائشی ہونا ضروری ہے۔

اس کے علاوہ:

عمر کم از کم 18 سال ہو۔

درست شناختی کارڈ موجود ہو۔

کسی غیر ملکی آجر کی جانب سے تصدیق شدہ جاب آفر لیٹر موجود ہو۔

پروگرام کی ویب سائٹ پر دی گئی شرائط کے مطابق ملازمت کی ماہانہ تنخواہ 5 ہزار سعودی ریال سے کم یا دیگر کرنسی میں اس کے مساوی ہو۔

درخواست کیسے دی جائے گی؟

اہل امیدوار پرواز کارڈ کے آن لائن پورٹل کے ذریعے درخواست جمع کراسکتے ہیں۔ جن افراد کے پاس پہلے سے بیرونِ ملک ملازمت کا آفر لیٹر موجود ہے، وہ براہِ راست درخواست دے سکتے ہیں یا رجسٹرڈ اوورسیز ایمپلائمنٹ پروموٹر کے ذریعے درخواست کے عمل کو آگے بڑھا سکتے ہیں۔

درخواست کے دوران امیدوار کو متعلقہ دستاویزات بھی فراہم کرنا ہوں گی۔

کون سی دستاویزات ضروری ہوں گی؟

درخواست کے لیے امیدوار کو ضرورت کے مطابق جاب آفر لیٹر، میڈیکل سرٹیفکیٹ اور اسکل ویری فکیشن سے متعلق دستاویزات اپ لوڈ کرنا ہوں گی۔

درخواست موصول ہونے کے بعد PSDF امیدوار کی فراہم کردہ معلومات اور دستاویزات کا جائزہ لے گا اور اہل امیدواروں کو اگلے مرحلے سے متعلق آگاہ کیا جائے گا۔

قرض منظور ہونے کے بعد کیا ہوگا؟

درخواست منظور ہونے کے بعد قرض کی کارروائی بینک کے ذریعے مکمل کی جائے گی۔ سرکاری طریقہ کار کے مطابق منظور شدہ رقم مخصوص مراحل مکمل ہونے کے بعد دستیاب ہوگی، جبکہ رقم کو ویزا، ٹکٹ اور دیگر منظور شدہ اخراجات کے لیے استعمال کیا جاسکے گا۔

4 لاکھ 50 ہزار ہنرمند نوجوانوں کیلئے بڑا ہدف

پرواز کارڈ پروگرام کا مقصد صرف مالی معاونت فراہم کرنا نہیں بلکہ پنجاب کے ہنرمند نوجوانوں کو قانونی اور محفوظ طریقے سے بیرونِ ملک روزگار کے مواقع تک پہنچانا بھی ہے۔

PSDF اور بینک آف پنجاب کے معاہدے کے مطابق پروگرام کے تحت 4 لاکھ 50 ہزار ہنرمند نوجوانوں کو بیرونِ ملک روزگار کے مواقع تک رسائی دینے کا ہدف مقرر کیا گیا ہے، جبکہ دو سال کے دوران 45 ہزار افراد کو قرض فراہم کرنے کا ہدف بھی رکھا گیا ہے۔

نوجوانوں کو کیا فائدہ ہوگا؟

پرواز کارڈ کے ذریعے حکومت کا مقصد بیرونِ ملک ملازمت حاصل کرنے والے نوجوانوں کے لیے ابتدائی مالی مشکلات کم کرنا ہے۔ اس اقدام سے ایسے افراد کو فائدہ پہنچنے کی توقع ہے جو ملازمت حاصل کرنے کے باوجود ویزا، ٹکٹ اور دیگر لازمی اخراجات پورے نہ کر پانے کے باعث اپنا سفر شروع نہیں کر پاتے۔

حکام کے مطابق بیرونِ ملک روزگار کے مواقع میں اضافے سے نہ صرف نوجوانوں اور ان کے خاندانوں کی معاشی صورتحال بہتر ہوسکتی ہے بلکہ مستقبل میں پاکستان کو موصول ہونے والی ترسیلاتِ زر میں بھی اضافہ متوقع ہے۔