وزیراعظم شہباز شریف کی گوگل وفد سے ملاقات، پاکستان میں ٹیکنالوجی کے مواقع پر گفتگو

وزیراعظم شہباز شریف سے گوگل کے نائب صدر ولسن اور ان کے وفد نے ملاقات کی، جس میں پاکستان میں ٹیکنالوجی کے شعبے میں تعاون اور مستقبل کے امکانات پر تبادلہ خیال کیا گیا۔ وزیراعظم نے گوگل کے وفد کا پاکستان آمد پر خیرمقدم کیا اور کہا کہ پاکستان گوگل کے لیے ایک اہم اور خوبصورت نئے سفر کا آغاز ہے۔

وزیراعظم شہباز شریف نے کہا کہ گوگل دنیا کی معروف ٹیکنالوجی کمپنیوں میں شامل ہے۔ پاکستان میں گوگل کے لیے بے پناہ مواقع موجود ہیں۔ انہوں نے اس امید کا اظہار کیا کہ ٹیکنالوجی کے شعبے میں پاکستان اور گوگل کے درمیان تعاون مزید مضبوط ہوگا۔

شہباز شریف کا کہنا تھا کہ پاکستان میں نوجوانوں کی بڑی تعداد موجود ہے، جو ٹیکنالوجی اور جدید مہارتوں کے ذریعے ملک کی ترقی میں اہم کردار ادا کرسکتی ہے۔ انہوں نے گوگل کے ساتھ تعاون کو ڈیجیٹل شعبے میں نئے مواقع پیدا کرنے کے لیے اہم قرار دیا۔

ملاقات کے دوران پاکستان میں گوگل کی سرگرمیوں اور مستقبل میں مزید تعاون کے امکانات پر بھی بات چیت ہوئی۔ وزیراعظم نے گوگل کے وفد کو پاکستان میں سرمایہ کاری اور ٹیکنالوجی کے شعبے میں کام کرنے کے لیے دستیاب مواقع سے آگاہ کیا۔

اس موقع پر گوگل کے نائب صدر ولسن نے کہا کہ گوگل پاکستان کے ساتھ طویل المدتی شراکت داری کا خواہاں ہے۔ انہوں نے پاکستان میں موجود مواقع اور ٹیکنالوجی کے شعبے میں تعاون کے امکانات کو اہم قرار دیا۔