پرواز کارڈ!!! بیرونِ ملک ملازمت حاصل کرنے کے خواہشمند پاکستانیوں کی بڑی پریشانی ختم

حکومت پنجاب نے بیرون ملک ملازمت حاصل کرنے والے افراد کی مالی مشکلات کم کرنے کے لیے پرواز کارڈ پروگرام شروع کردیا ہے۔ اس پروگرام کے تحت اہل افراد کو بیرون ملک روزگار کے لیے درکار مختلف اخراجات کی ادائیگی میں بلاسود مالی سہولت فراہم کی جائے گی۔

پنجاب اسکلز ڈویلپمنٹ فنڈ کے تعاون سے شروع کیے گئے اس پروگرام کا مقصد ایسے افراد کی مدد کرنا ہے جنہیں بیرون ملک ملازمت کی پیشکش تو مل چکی ہے، لیکن ویزا، میڈیکل، ٹکٹ اور دیگر ضروری اخراجات پورے کرنا مشکل ہوتا ہے۔

پرواز کارڈ کے تحت اسکلڈ، سیمی اسکلڈ اور ان اسکلڈ ورکرز کے علاوہ پروفیشنلز بھی فنانسنگ حاصل کرسکیں گے۔ اس کے لیے بیرون ملک ملازمت کی تصدیق شدہ پیشکش ہونا ضروری ہے۔ اہل امیدوار حاصل کی گئی مالی سہولت کو آسان اقساط میں واپس کرسکیں گے۔

پروگرام کے لیے بنیادی شرائط بھی مقرر کی گئی ہیں۔ امیدوار کی عمر کم از کم 18 سال ہونی چاہیے۔ اس کے پاس درست شناختی کارڈ ہونا ضروری ہے۔ اس کے علاوہ درخواست گزار کا پنجاب کا رہائشی ہونا بھی لازمی قرار دیا گیا ہے۔ بیرون ملک ملازمت کی تصدیق شدہ پیشکش بھی بنیادی شرط میں شامل ہے۔

پرواز کارڈ کے ذریعے کئی اہم اخراجات کے لیے مالی مدد حاصل کی جاسکے گی۔ ان میں ویزا پروسیسنگ، میڈیکل معائنہ، اسکلز ویری فکیشن اور ایئر ٹکٹ کے اخراجات شامل ہیں۔ بیرون ملک ملازمت دلانے والے اوورسیز ایمپلائمنٹ پروموٹرز کی فیس اور ملازمت سے متعلق دیگر اہل اخراجات بھی اس سہولت میں شامل ہوسکتے ہیں۔

حکام کے مطابق پورے پروگرام کو ڈیجیٹل نظام کے تحت چلایا جائے گا۔ امیدوار آن لائن درخواست دے سکیں گے۔ درخواست کی پراسیسنگ اور اس کی پیش رفت کو بھی ڈیجیٹل طریقے سے ٹریک کیا جاسکے گا۔ اس اقدام کا مقصد عمل کو آسان اور شفاف بنانا ہے۔

حکام نے بتایا کہ اگر درخواست مکمل ہو اور تمام ضروری دستاویزات اور تصدیق موجود ہو تو اسے تقریباً 7 سے 10 ورکنگ دن میں پراسیس کرنے کا ہدف مقرر کیا گیا ہے۔ اس سے امیدواروں کو اپنی بیرون ملک روانگی کی تیاری میں آسانی ہوسکتی ہے۔

جن افراد کے پاس ابھی بیرون ملک ملازمت نہیں ہے، وہ بھی روزگار کے مواقع تلاش کرسکتے ہیں۔ اس مقصد کے لیے رجسٹرڈ اوورسیز ایمپلائمنٹ پروموٹرز کے ذریعے دستیاب ملازمتوں سے فائدہ اٹھایا جاسکتا ہے۔ ملازمت کی تصدیق شدہ پیشکش ملنے کے بعد امیدوار مقررہ شرائط پوری کرکے پرواز کارڈ کے لیے درخواست دے سکتا ہے۔

پنجاب اسکلز ڈویلپمنٹ فنڈ کے تحت اوورسیز ایمپلائمنٹ پروموٹرز کے لیے بھی رجسٹریشن کا راستہ رکھا گیا ہے۔ اس کے ذریعے وہ قانونی اور شفاف طریقے سے بیرون ملک روزگار کے مواقع فراہم کرسکیں گے۔

پرواز کارڈ پروگرام سے ان افراد کو خاص طور پر فائدہ ہوسکتا ہے جو بیرون ملک ملازمت حاصل کرنے کے باوجود ابتدائی اخراجات پورے کرنے میں مشکلات کا سامنا کرتے ہیں۔ بلاسود مالی سہولت کے ذریعے انہیں ویزا، میڈیکل، ٹکٹ اور دیگر ضروری اخراجات پورے کرنے میں مدد مل سکے گی۔