کسی بھی جارحیت کے جواب میں دشمن کو حیران کن سرپرائزز دیں گے، ایرانی مسلح افواج

ایرانی مسلح افواج کے ترجمان نے خبردار کیا ہے کہ ایران کے خلاف کسی بھی جارحیت کا جواب نئی فوجی ٹیکنالوجیز سے دیا جائے گا۔

ایرانی مسلح افواج کے ترجمان بریگیڈیئر جنرل ابفضل شکارچی نے خبردار کیا ہے کہ ایران کے خلاف کسی بھی ممکنہ جارحیت کا جواب نئی فوجی ٹیکنالوجیز کے ساتھ دیا جائے گا۔

انہوں نے سرکاری میڈیا کو بتایا کہ ایران کی فوج غیر روایتی جنگ کی طرف منتقلی اور اندرون ملک تیار کردہ دفاعی ٹیکنالوجی پر زیادہ انحصار کرنے کی وجہ سے مزید مضبوط ہو گئی ہے۔

یہ بھی پڑھیں : جب تک ایران کی شرائط پوری نہیں ہوتیں، آبنائے ہرمز بند رہے گی، ابراہیم عزیزی

انہوں نے کہا کہ ملک اب امریکہ اور اسرائیل کے ساتھ کشیدگی کے پچھلے دور کے مقابلے میں بہت بہتر پوزیشن میں ہے۔

انہوں نے زور دے کر کہا کہ ایران کے میزائل اور ڈرون زیادہ جدید اور طاقتور ہو چکے ہیں اور اس بار ہمارے پاس دشمن کے لیے حیران کن چیزیں موجود ہیں۔ ہم دشمن کی کسی بھی ممکنہ جارحیت کا جواب نئی فوجی ٹیکنالوجیز سے دیں گے۔

انہوں نے مزید کہا کہ ایران کا غیر روایتی طریقہ کار مہنگے اور بھاری ہتھیاروں کا مقابلہ کم خرچ لیکن مؤثر اور عملی دفاعی سازوسامان کے ساتھ کرنے پر مرکوز ہے۔