سندھ پولیس ویری فکیشن سرٹیفکیٹ اب گھر بیٹھے آن لائن حاصل کریں، مکمل طریقہ سامنے آگیا

کراچی: سندھ پولیس نے جدید ٹیکنالوجی سے استفادہ کرتے ہوئے پولیس ویری فکیشن سرٹیفکیٹ کے حصول کا عمل آسان بنا دیا ہے، جس کے تحت شہری گھر بیٹھے آن لائن درخواست جمع کراسکتے ہیں۔

آن لائن سہولت کے باعث شہریوں کو سرٹیفکیٹ کے لیے بار بار پولیس دفتر جانے کی ضرورت نہیں رہے گی۔ درخواست دینے کے لیے موبائل فون یا کمپیوٹر استعمال کیا جاسکتا ہے۔

پولیس ویری فکیشن سرٹیفکیٹ حاصل کرنے کے لیے سب سے پہلے موبائل فون یا کمپیوٹر پر گوگل کھول کر سندھ پولیس کی ویب سائٹ پر جانا ہوگا۔

سندھ پولیس کی ویب سائٹ کھلنے کے بعد ہوم پیج پر موجود آن لائن سروسز کے آپشن میں داخل ہوکر ’گیٹ یور ویری فکیشن سرٹیفکیٹ‘ کے آپشن پر کلک کرنا ہوگا۔

اگر شہری پہلی مرتبہ سرٹیفکیٹ کے لیے درخواست دے رہا ہے تو اسے ’نیو ایپلیکیشن‘ کا انتخاب کرنا ہوگا۔ اس کے بعد آن لائن فارم سامنے آئے گا جس میں درخواست گزار کی ذاتی معلومات درج کرنا ہوں گی۔

درخواست گزار کو اپنا مکمل نام، والد کا نام، تاریخ پیدائش اور شناختی کارڈ نمبر درج کرنا ہوگا۔ اس کے ساتھ شناختی کارڈ کے اجرا اور میعاد ختم ہونے کی تاریخ بھی فراہم کرنا ہوگی۔

فارم میں موبائل فون نمبر اور موجودہ رہائشی پتے کی تفصیلات بھی درج کرنا ضروری ہوں گی۔ درخواست گزار کو یہ معلومات بھی فراہم کرنا ہوگی کہ وہ موجودہ پتے پر کب سے رہائش پذیر ہے۔

اس کے بعد متعلقہ ضلع کا انتخاب کرنا ہوگا جبکہ ملک کے آپشن میں پاکستان کا انتخاب کیا جائے گا۔

اگر پولیس ویری فکیشن سرٹیفکیٹ کسی دوسرے ملک میں استعمال کرنا مقصود ہو تو درخواست گزار کو متعلقہ ملک کا نام بھی درج کرنا ہوگا تاکہ درخواست میں اس مقصد کی وضاحت موجود ہو۔

آن لائن درخواست کے اگلے مرحلے میں دو ضامنوں کی تفصیلات فراہم کرنا ہوں گی۔ دونوں ضامنوں کا مکمل نام، والد کا نام، شناختی کارڈ نمبر، رابطہ نمبر اور رہائشی پتہ درج کرنا ضروری ہوگا۔

اس کے بعد درخواست گزار کو مطلوبہ دستاویزات آن لائن اپ لوڈ کرنا ہوں گی۔ ان دستاویزات میں پاسپورٹ سائز تصویر، یوٹیلیٹی بل کی نقل اور ویری فکیشن سے متعلق دیگر ضروری کاغذات شامل ہوں گے۔

تمام مطلوبہ معلومات درج کرنے اور ضروری دستاویزات اپ لوڈ کرنے کے بعد درخواست گزار کو فارم کا جائزہ لینا ہوگا تاکہ کسی قسم کی معلومات غلط یا نامکمل نہ رہ جائے۔

معلومات مکمل ہونے کے بعد ’Submit‘ کے بٹن پر کلک کرکے درخواست آن لائن جمع کرائی جاسکتی ہے۔

اس طرح سندھ پولیس کے آن لائن نظام کے ذریعے شہری گھر بیٹھے ویری فکیشن سرٹیفکیٹ کے لیے درخواست دے سکتے ہیں، جس سے روایتی طریقہ کار میں لگنے والا وقت اور دفاتر کے چکر کم کرنے میں مدد مل سکتی ہے۔