قرضہ نہ ملنے پر دو بھائی بینک سے کروڑوں روپے کا سونا لے اُڑے

قرض کی درخواست مسترد ہونے کے بعد دو بھائی بینک لاکر سے لاکھوں روپے مالیت کے سونے کے زیورات چوری کرکے فرار ہوگئے۔

پولیس کا کہنا ہے کہ تفتیش میں انکشاف ہوا ہے کہ ڈکیتی میں دو بھائی ملوث پائے گئے، کیونکہ انہوں نے اسی بینک میں قرض کے لیے درخواست دی تھی اور انکار کے بعد انہوں نے اپنے اتحادیوں کو اکٹھا کیا اور بینک کو لوٹ لیا۔

سازوسامان سے لیس گروپ کھڑکی توڑ کر بینک میں داخل ہوا، اس کے بعد گینگ نے لاکروں کی طرف بڑھ کر بھاری اوزاروں کا استعمال کرتے ہوئے سونے کے قیمتی زیورات پر مشتمل ایک لاکر کو کامیابی سے کھول دیا۔

چالاک چوروں نے نہ صرف لاکر کا سامان چوری کیا بلکہ ارد گرد مرچ پاؤڈر چھڑک کر ثبوت بھی مٹا دیئے۔

یہ واقعہ کرناٹک کے داونگیرے ضلع میں اسٹیٹ بینک آف انڈیا (ایس بی آئی) کی برانچ میں پیش آیا۔

ایک پریس کانفرنس سے خطاب کرتے ہوئے انسپکٹر جنرل پولیس روی کانت گوڑا نے کہا کہ اس واقعہ میں کل چھ افراد ملوث تھے، شواہد کی کمی کے باوجود تمام چھ افراد کو گرفتار کر لیا گیا۔

یہ ان کی جرم کی پہلی کوشش تھی، لیکن ملزمان نے یہ سب کام بغیر کسی ثبوت کے بہت چالاکی سے کیا۔

پولیس کا کہنا ہے کہ مرکزی ملزم 20 سال سے اپنے والد کے ساتھ مل کر بیکری چلا رہا ہے اور اس نے گزشتہ سال دو بار بینک سے قرض کے لیے درخواست دی تھی۔

آئی جی پی روی کانت گوڑا نے مزید کہا کہ مشتبہ شخص نے ڈکیتی کرنے کے لئے مختلف ویب سائٹس کے ذریعے کچھ مہینوں تک تربیت حاصل کی۔

پولیس کی تفتیش میں یہ بات بھی سامنے آئی ہے کہ ملزمان نے ڈکیتی میں استعمال ہونے والی اشیاء جیسے ٹوپیاں، موزے، گیس سلنڈر اور ہائیڈرولک کٹر قریبی جھیل میں پھینک دیے۔