کیا 2026 میں دنیا ختم ہونے والی ہے؟ سائنسی ماہرین کا اہم بیان سامنے آ گیا

سال 2025 کے اختتام کے بعد سوشل میڈیا پر یہ دعوے بہت تیزی سے وائرل ہو گئے ہیں کہ دنیا 2026 میں ختم ہو جائے گی۔

 ٹک ٹاک ویڈیوز، سنسنی خیز پوسٹس اور مختلف سوشل پلیٹ فارمز پر عالمی تباہی کے خوف نے عوام کی توجہ حاصل کر لی۔ ماہرین کا کہنا ہے کہ یہ سب دعوے بلا جواز اور غیر سائنسی ہیں۔ دنیا کے 2026 میں ختم ہونے کی کوئی سائنسی بنیاد نہیں ہے۔ یہ افواہیں پرانے نظریات، انتہا پسندانہ پیشگوئیوں اور عالمی بے چینی کا نتیجہ ہیں۔

ان افواہوں کی ایک وجہ 1960 کی دہائی میں جرمن سائنسدان ہائنز فان فوسٹر کا ریاضیاتی ماڈل بتایا جاتا ہے۔ اس ماڈل میں انسانی آبادی کے حد سے زیادہ بڑھنے کا خدشہ ظاہر کیا گیا تھا۔ تاہم کچھ لوگوں نے اسے غلط طور پر دنیا کے خاتمے سے جوڑ دیا۔

اسی طرح امریکی ریٹائرڈ ماہر ماحولیات گائے مکفرسن کی ماحولیاتی تبدیلی سے متعلق پیشگوئیاں بھی 2026 کے خاتمے کے نظریے سے منسلک کی جا رہی ہیں۔ اصل میں انہوں نے انسانی تہذیب کے ممکنہ بحران کی بات کی تھی، نہ کہ کسی مخصوص سال میں دنیا کے خاتمے کی۔

ماہرین کہتے ہیں کہ ماحولیاتی تبدیلی، بڑھتی ہوئی آبادی، قدرتی وسائل کی کمی، ٹیکنالوجی کے خطرات اور عالمی کشیدگی واقعی سنگین مسائل ہیں۔ لیکن ان کا 2026 میں دنیا کے ختم ہونے سے کوئی براہِ راست تعلق نہیں ہے۔

نفسیاتی اور سماجی عوامل بھی ان افواہوں کے پھیلاؤ میں اہم کردار ادا کر رہے ہیں۔ سوشل میڈیا پر وائرل مواد تیزی سے پھیلتا ہے اور بار بار شیئر ہونے والی پوسٹس عوام میں خوف اور غلط فہمی بڑھا دیتی ہیں۔

ماہرین نے عوام سے اپیل کی ہے کہ وہ بے بنیاد افواہوں پر یقین کرنے کے بجائے مستند سائنسی ذرائع اور حقائق پر توجہ دیں۔ غلط اطلاعات اور خوف کا پھیلاؤ خود ایک بڑا سماجی مسئلہ بن چکا ہے۔