اے سی خراب ہونے کی یہ نشانیاں نظر انداز نہ کریں، بڑے نقصان سے بچنے کا آسان طریقہ

گرمی کے موسم میں ایئر کنڈیشنر گھروں اور دفاتر کی اہم ضرورت بن جاتا ہے۔ مسلسل استعمال کے باعث اس میں مختلف مسائل بھی پیدا ہوسکتے ہیں۔

ماہرین کا کہنا ہے کہ اے سی کی کارکردگی میں اچانک تبدیلی کو معمولی خرابی سمجھ کر نظر انداز نہیں کرنا چاہیے۔ کچھ علامات ایسی ہوتی ہیں جو بڑے فنی یا برقی مسئلے کی نشاندہی کرتی ہیں۔

اے سی پہلے کے مقابلے میں کم ٹھنڈک دے رہا ہو تو اس کی کئی وجوہات ہوسکتی ہیں۔ ریفریجرنٹ گیس کی کمی، فلٹر کا گندا یا بند ہونا اور کمپریسر میں خرابی اس کی بڑی وجوہات میں شامل ہیں۔ بعض اوقات بیرونی یونٹ کی صفائی نہ ہونے سے بھی کولنگ متاثر ہوتی ہے۔ ایسی صورت میں اے سی کو مسلسل چلانے کے بجائے ماہر ٹیکنیشن سے معائنہ کروانا بہتر ہے۔

ماہرین کے مطابق اے سی کے پلگ، تار یا وولٹیج اسٹیبلائزر کے قریب چنگاریاں نکلنا انتہائی خطرناک علامت ہے۔ اگر کسی جگہ سے جلنے کی بو بھی محسوس ہو تو اسے معمولی مسئلہ نہیں سمجھنا چاہیے۔ یہ خراب وائرنگ، ڈھیلے کنکشن یا برقی نظام میں خرابی کی وجہ سے ہوسکتا ہے۔ ایسی صورتحال میں اے سی فوراً بند کرکے بجلی کی سپلائی منقطع کرنا اور ماہر الیکٹریشن یا ٹیکنیشن سے رابطہ کرنا ضروری ہے۔

اے سی کے غیر معمولی شور کو بھی نظر انداز نہیں کرنا چاہیے۔ اگر مشین سے پہلے کی نسبت زیادہ آواز آنے لگے یا کمپن محسوس ہو تو پنکھے، موٹر، کمپریسر یا کسی دوسرے حصے میں خرابی ہوسکتی ہے۔ بروقت چیک اپ سے معمولی خرابی کو بڑے مسئلے میں تبدیل ہونے سے روکا جاسکتا ہے۔

اسی طرح اے سی سے پانی کا غیر معمولی اخراج بھی توجہ طلب ہے۔ ڈرین پائپ بند ہونے یا اندرونی حصے میں کسی خرابی کے باعث پانی کمرے میں گر سکتا ہے۔ اس سے دیواروں، فرنیچر اور بجلی کے کنکشن کو نقصان پہنچنے کا خطرہ رہتا ہے۔ اس لیے پانی ٹپکنے کی صورت میں بھی اے سی کی جانچ کرانا ضروری ہے۔

ماہرین کا مشورہ ہے کہ اگر اے سی بار بار خراب ہو رہا ہو تو ہر مرتبہ عارضی مرمت پر رقم خرچ کرنے کے بجائے اس کی مجموعی حالت کا جائزہ لینا چاہیے۔ پرانا اے سی زیادہ بجلی استعمال کرسکتا ہے اور مسلسل خرابی کی صورت میں اخراجات بھی بڑھ جاتے ہیں۔ ایسے میں نیا اور توانائی بچانے والا اے سی خریدنا طویل مدت میں بہتر فیصلہ ہوسکتا ہے۔

اے سی کی عمر بڑھانے کے لیے باقاعدہ دیکھ بھال بھی ضروری ہے۔ فلٹرز کی صفائی، بیرونی یونٹ کا معائنہ اور وقتاً فوقتاً ٹیکنیکل سروس کروانے سے کئی مسائل سے پہلے ہی بچا جاسکتا ہے۔ خاص طور پر شدید گرمی میں اے سی مسلسل چلانے سے پہلے اس کی حالت ضرور چیک کرنی چاہیے۔