گاڑی کے ٹرن سگنل سے کلک کلک کی آواز کیوں آتی ہے؟ دلچسپ وجہ سامنے آگئی

اگر آپ گاڑی چلاتے ہیں تو ٹرن لیتے وقت ایک مخصوص ’کلک کلک‘ کی آواز ضرور سنتے ہوں گے۔ اس دوران ڈیش بورڈ پر موجود اشارے کی لائٹ بھی جلتی اور بجھتی رہتی ہے۔ بظاہر یہ گاڑی کے عام فیچرز میں شامل ہے، لیکن اس آواز کے پیچھے ایک دلچسپ تکنیکی وجہ موجود ہے۔

ٹرن سگنل کا یہ نظام کئی دہائیوں پرانا ہے۔ گاڑیوں میں فلیشنگ ٹرن سگنلز کا استعمال 1930 کی دہائی کے آخر میں شروع ہوا۔ اس وقت سگنل لائٹس کو آن اور آف کرنے کے لیے آج کے جدید الیکٹرانک نظام کے بجائے ایک خاص مکینیکل طریقہ استعمال کیا جاتا تھا۔

پرانے نظام میں دو مختلف دھاتوں سے بنا ایک اسپرنگ استعمال ہوتا تھا۔ جب ڈرائیور ٹرن سگنل آن کرتا تو اسپرنگ میں بجلی گزرتی اور وہ گرم ہونا شروع ہوجاتا تھا۔ گرمی کی وجہ سے اس کی شکل میں تبدیلی آتی اور وہ ایک دھاتی رابطے کو چھو لیتا تھا۔ اس رابطے کے قائم ہوتے ہی بجلی سگنل لائٹس تک پہنچتی اور وہ روشن ہوجاتیں۔

اس کے بعد اسپرنگ ٹھنڈا ہوتا اور دوبارہ اپنی اصل حالت میں واپس آجاتا۔ اس سے برقی رابطہ ٹوٹ جاتا اور سگنل لائٹ بند ہوجاتی۔ کچھ ہی دیر بعد یہی عمل دوبارہ شروع ہوتا۔ یوں لائٹ مسلسل جلنے اور بجھنے لگتی تھی۔

اسی عمل کے دوران پیدا ہونے والی مکینیکل حرکت سے ’کلک کلک‘ کی آواز سنائی دیتی تھی۔ یعنی پرانی گاڑیوں میں یہ آواز صرف ڈرائیور کو متوجہ کرنے کے لیے نہیں تھی بلکہ ٹرن سگنل کے کام کرنے کے اصل مکینیکل نظام کا حصہ بھی تھی۔

وقت کے ساتھ گاڑیوں کی ٹیکنالوجی میں بڑی تبدیلیاں آئیں۔ حرارت سے چلنے والے اسپرنگ کی جگہ زیادہ جدید الیکٹرو مکینیکل اور بعد میں الیکٹرانک نظام نے لے لی۔ موجودہ دور کی بہت سی گاڑیوں میں ٹرن سگنل کو کنٹرول کرنے کے لیے کمپیوٹرائزڈ سسٹمز اور الیکٹرانک سرکٹس استعمال ہوتے ہیں۔

اس کے باوجود ’کلک کلک‘ کی آواز کو ختم نہیں کیا گیا۔ جدید گاڑیوں میں یہ آواز اکثر الیکٹرانک طریقے سے پیدا کی جاتی ہے۔ اس کا مقصد ڈرائیور کو یہ احساس دلانا ہے کہ ٹرن سگنل فعال ہے۔ اگر یہ آواز بالکل ختم کردی جائے تو ممکن ہے ڈرائیور کو یہ اندازہ نہ ہو کہ سگنل آن ہے یا نہیں۔

دلچسپ بات یہ ہے کہ موجودہ گاڑیوں میں اس آواز کا سگنل لائٹ کے آن اور آف ہونے کے لیے پہلے جیسا تکنیکی کردار نہیں رہا۔ اب یہ زیادہ تر ایک صوتی اشارے کے طور پر استعمال ہوتی ہے۔ یعنی گاڑی جدید ہوچکی ہے، لیکن ٹرن سگنل کی مشہور ’کلک کلک‘ آواز اب بھی برقرار ہے۔