گھی اور کوکنگ آئل کی قیمتوں میں بڑا اضافہ

ملک بھر میں مہنگائی کا دباؤ بدستور برقرار ہے اور روزمرہ استعمال کی اشیاء کی قیمتوں میں مسلسل اضافہ شہریوں کے لیے مشکلات بڑھا رہا ہے۔

مارکیٹ ذرائع کے مطابق درجہ اول گھی اور کوکنگ آئل کی قیمت میں 3 روپے فی کلو اضافہ ہوا ہے۔ اس اضافے کے بعد فی کلو اور فی لیٹر قیمت تقریباً 598 روپے تک پہنچ گئی ہے۔

اسی طرح سن فلاور آئل کی قیمت بھی بڑھ کر 618 روپے فی لیٹر کی بلند ترین سطح پر پہنچ گئی ہے۔ قیمتوں میں بار بار اضافے سے فروخت بھی متاثر ہو رہی ہے۔

شہریوں کا کہنا ہے کہ روزمرہ کی بنیادی اشیاء مسلسل مہنگی ہو رہی ہیں جس سے گھریلو بجٹ بری طرح متاثر ہوا ہے۔ خاص طور پر کم اور متوسط آمدنی والے طبقے کے لیے کھانے پینے کی اشیاء خریدنا مشکل ہوتا جا رہا ہے۔

دوسری جانب آٹے کی قیمتوں میں بھی اضافہ جاری ہے۔ گزشتہ ہفتے 10 سے 20 کلو کے تھیلے کی قیمت میں 120 سے 200 روپے تک اضافہ دیکھا گیا ہے۔ اس صورتحال پر عوام میں تشویش بڑھ رہی ہے۔

معیاری چاول بھی مہنگائی کی نئی لہر کی وجہ سے عام صارف کی پہنچ سے دور ہو رہے ہیں۔ مارکیٹ ماہرین کے مطابق درآمدی لاگت، ٹرانسپورٹ اخراجات اور مہنگے ایندھن نے قیمتوں میں اضافے کو مزید بڑھا دیا ہے۔