ملک میں پیٹرول کے ذخائر پر تشویش، آئل کمپنیوں نے حکومت کو ہنگامی اقدامات کی سفارش کر دی

پاکستان میں پیٹرول کی فراہمی سے متعلق نئی تشویش سامنے آگئی ہے۔

آئل کمپنیز ایڈوائزری کونسل (او سی اے سی) نے وفاقی وزیر پیٹرولیم علی پرویز ملک کو ایک ہنگامی مراسلہ ارسال کرتے ہوئے خبردار کیا ہے کہ اگر موجودہ صورتحال برقرار رہی تو آنے والے دنوں میں ملک کے مختلف علاقوں میں پیٹرول کی قلت پیدا ہو سکتی ہے۔ کونسل نے حکومت سے فوری اقدامات کرنے کی درخواست کی ہے تاکہ سپلائی کا نظام متاثر نہ ہو۔

مراسلے کے مطابق اس وقت ملک میں تقریباً 3 لاکھ 70 ہزار ٹن پیٹرول کا ذخیرہ موجود ہے، جو اندازاً 15 روز کی ضروریات پوری کرنے کے لیے کافی ہے۔ آئل کمپنیوں کا کہنا ہے کہ اگر درآمدی عمل میں تاخیر برقرار رہی تو ذخائر میں مزید کمی آسکتی ہے، جس سے مارکیٹ میں سپلائی متاثر ہونے کا خدشہ پیدا ہو جائے گا۔

او سی اے سی نے اپنی رپورٹ میں بتایا کہ درآمدی پیٹرولیم مصنوعات کی کسٹمز کلیئرنس میں تاخیر سپلائی چین کے لیے بڑا مسئلہ بن رہی ہے۔ خاص طور پر وی بوک (WeBOC) نظام کے ذریعے کلیئرنس کے عمل میں رکاوٹوں کے باعث درآمد شدہ کارگو بروقت مارکیٹ تک نہیں پہنچ پا رہا، جس سے ایندھن کی دستیابی متاثر ہونے کا خطرہ بڑھ گیا ہے۔

مراسلے میں اس بات کی بھی نشاندہی کی گئی کہ پاکستان اسٹیٹ آئل (پی ایس او) کے بعض درآمدی کارگو کی بروقت منظوری نہ ملنے سے سپلائی پر مزید دباؤ بڑھ رہا ہے۔ آئل کمپنیوں کا مؤقف ہے کہ اگر یہ صورتحال جاری رہی تو بالخصوص اپ کنٹری علاقوں میں پیٹرول کی قلت پیدا ہونے کے امکانات زیادہ ہو سکتے ہیں۔

آئل مارکیٹنگ کمپنیوں نے حکومت سے اپنے مالی مسائل بھی فوری حل کرنے کا مطالبہ کیا ہے۔ او سی اے سی کے مطابق حکومت کی جانب سے 66 ارب 70 کروڑ روپے کے پی ڈی سی (Price Differential Claims) واجبات ابھی تک ادا نہیں کیے گئے۔ اس وجہ سے کمپنیوں کو ورکنگ کیپیٹل کی شدید کمی کا سامنا ہے، جس سے درآمدات اور سپلائی کے معمولات متاثر ہو رہے ہیں۔

مراسلے میں کہا گیا ہے کہ عالمی سطح پر پیٹرولیم مصنوعات کی درآمدی لاگت میں اضافے کے باعث کمپنیوں کی مالی ضروریات پہلے ہی بڑھ چکی ہیں۔ ایسے میں اگر واجبات کی ادائیگی میں مزید تاخیر ہوئی تو آئندہ درآمدی منصوبوں پر بھی منفی اثر پڑ سکتا ہے۔

او سی اے سی نے وفاقی حکومت سے مطالبہ کیا ہے کہ وی بوک نظام میں موجود رکاوٹیں فوری دور کی جائیں، زیر التوا کلیمز کی ادائیگی جلد کی جائے اور درآمدی عمل کو تیز بنانے کے لیے متعلقہ اداروں کو ہدایات جاری کی جائیں۔