پنجاب میں نئی گاڑی خریدنے والوں کیلئے اہم فیصلہ، رجسٹریشن کا نیا نظام نافذ

پنجاب حکومت نے نئی گاڑیاں خریدنے والے شہریوں کے لیے رجسٹریشن کا طریقہ کار مزید منظم اور شفاف بنانے کا فیصلہ کر لیا ہے۔

 اب صوبے میں فروخت ہونے والی ہر نئی گاڑی کی رجسٹریشن پنجاب کے اندر ہی لازمی ہوگی۔ اس کے علاوہ گاڑی خریدار کے حوالے کرنے سے پہلے اس کی رجسٹریشن مکمل کرنا بھی ضروری قرار دیا گیا ہے۔ اس اقدام کا مقصد جعلی رجسٹریشن، غیر ضروری تاخیر اور انتظامی مسائل کو کم کرنا ہے۔

ڈائریکٹر جنرل ایکسائز پنجاب عمر شیر چٹھہ نے اس حوالے سے موٹر برانچز کے افسران اور ملک بھر کے کار مینوفیکچررز کو فوری اقدامات کی ہدایت جاری کر دی ہے۔ اب پنجاب میں فروخت ہونے والی ہر نئی گاڑی صرف رجسٹریشن مکمل ہونے کے بعد ہی صارف کے حوالے کی جائے گی۔ اس سے گاڑی خریدنے والے افراد کو بعد میں رجسٹریشن کے لیے دفاتر کے چکر نہیں لگانے پڑیں گے۔

حکام نے تمام کار ساز کمپنیوں کو ہدایت کی ہے کہ وہ اپنے مجاز ڈیلرز کی مکمل فہرستیں متعلقہ موٹر برانچز کو فراہم کریں تاکہ انہیں ڈیلر وہیکل رجسٹریشن سسٹم (DVRS) کے تحت لائسنس جاری کیے جا سکیں۔ اس نظام کے ذریعے مجاز ڈیلرز خود گاڑیوں کی رجسٹریشن مکمل کر سکیں گے، جس سے پورا عمل پہلے کے مقابلے میں زیادہ تیز اور آسان ہو جائے گا۔

ڈی جی ایکسائز نے واضح کیا کہ اگر کوئی شہری پنجاب کے شناختی کارڈ پر نئی گاڑی خریدتا ہے تو اس گاڑی کی رجسٹریشن کروانا متعلقہ ڈیلر کی ذمہ داری ہوگی۔ جب تک رجسٹریشن مکمل نہیں ہوگی، گاڑی خریدار کے حوالے نہیں کی جا سکے گی۔ اس اقدام سے رجسٹریشن کے عمل میں شفافیت آئے گی اور ریکارڈ بھی بہتر انداز میں محفوظ رکھا جا سکے گا۔

محکمہ ایکسائز کے مطابق اس وقت لاہور سمیت پنجاب بھر میں 102 مجاز ڈیلرز ڈی وی آر ایس لائسنس کے تحت گاڑیوں کی رجسٹریشن کی سہولت فراہم کر رہے ہیں۔ جیسے ہی مزید ڈیلرز کی فہرستیں موصول ہوں گی، انہیں بھی مرحلہ وار لائسنس جاری کیے جائیں گے تاکہ رجسٹریشن کا نظام مزید وسیع کیا جا سکے۔

فی الحال ڈیلرز ہر نئی گاڑی کی رجسٹریشن کے لیے 2 ہزار روپے سروس چارج وصول کر رہے ہیں۔ تاہم محکمہ ایکسائز اس نظام کو مزید مؤثر بنانے کے لیے ان چارجز میں معمولی اضافے کی تجویز پر بھی غور کر رہا ہے۔ اس بارے میں حتمی فیصلہ متعلقہ حکام کی منظوری کے بعد کیا جائے گا۔

یہ تمام فیصلے ڈی جی ایکسائز عمر شیر چٹھہ کی زیر صدارت ہونے والے اجلاس میں کیے گئے، جس میں کار مینوفیکچررز اور موٹر برانچ کے ڈائریکٹرز نے شرکت کی۔ اجلاس میں تمام متعلقہ اداروں کو نئی ہدایات پر فوری عملدرآمد یقینی بنانے کی تاکید کی گئی تاکہ شہریوں کو بہتر، شفاف اور تیز رفتار رجسٹریشن سہولت فراہم کی جا سکے۔