طلبہ کو لیپ ٹاپ دینے سے متعلق عدالت سے اہم خبر آگئی

سندھ کے طلبہ کو لیپ ٹاپ فراہم کرنے سے متعلق درخواست پر سندھ ہائیکورٹ سکھر بینچ نے تفصیلی تحریری فیصلہ جاری کر دیا ہے۔

عدالت کی جانب سے جاری فیصلے میں کہا گیا ہے کہ سندھ حکومت آئندہ مالی سال کے بجٹ میں لیپ ٹاپ پالیسی شامل کرے۔ چیف سیکریٹری کو ہدایت دی گئی ہے کہ متعلقہ اداروں سے مشاورت کے بعد 45 دن کے اندر لیپ ٹاپ اسکیم کو حتمی شکل دی جائے۔

عدالتی بینچ جسٹس امجد علی بوھیو اور جسٹس علی حیدر پر مشتمل تھا۔ فیصلے میں آئین کے آرٹیکل 25A کا حوالہ دیا گیا ہے۔ عدالت نے کہا کہ تعلیم کو جدید تقاضوں کے مطابق ہونا چاہیے۔

عدالت کے مطابق موجودہ دور میں ڈیجیٹل آلات صرف سہولت نہیں بلکہ ضرورت بن چکے ہیں۔ اسکول، کالج اور یونیورسٹی کے طلبہ کو میرٹ کی بنیاد پر لیپ ٹاپ فراہم کیے جائیں۔ اس اقدام سے تعلیمی معیار بہتر ہوگا۔

فیصلے میں کہا گیا ہے کہ عدالتی احکامات پر عملدرآمد کی رپورٹ مقررہ تاریخ تک پیش کی جائے۔ حکومت کو ہدایت دی گئی ہے کہ طے شدہ وقت میں اقدامات مکمل کرے۔

یہ فیصلہ ایڈووکیٹ سہیل میمن کی درخواست پر سنایا گیا۔ طلبہ اور تعلیمی حلقوں نے اس پیش رفت کو مثبت قرار دیا ہے۔