کیا نیلم منیر شوبز چھوڑ رہی ہیں؟ اداکارہ نے بتادیا

پاکستانی اداکارہ نیلم منیر نے شادی کے بعد انٹرٹینمنٹ انڈسٹری چھوڑنے کی افواہوں کی تردید کردی۔

اپنی انسٹاگرام اسٹوری پر اداکارہ نے واضح کیا کہ اگرچہ وہ حال ہی میں شادی کے بندھن میں بندھ گئی ہیں لیکن ان کا اداکاری سے کنارہ کشی اختیار کرنے کا کوئی ارادہ نہیں ہے۔

نیلم منیر کا کہنا تھا کہ میرے بارے میں بہت سی افواہیں گردش کر رہی ہیں، اس لیے میں نے سوچا کہ مجھے اس غلط معلومات کو دور کرنا چاہیے۔

اداکارہ نے اپنی بات جاری رکھتے ہوئے کہا کہ ہاں میں شادی شدہ ہوں لیکن میں شوبز انڈسٹری کو خیرباد نہیں کہہ رہی۔

نیلم منیر نے کہا کہ اداکاری میرا جنون ہے اور میں ایسی کوئی چیز نہیں چھوڑ سکتی جس سے میں اتنا پیار کرتی ہوں۔

اداکارہ نے اپنی زندگی کے ایک نئے باب کا آغاز 2025 کے اوائل میں پنجاب کے شہر میانوالی سے تعلق رکھنے والے بزنس مین محمد رشید سے کیا جو دبئی میں مقیم ہیں۔

 

View this post on Instagram

 

A post shared by DIVA Magazine Pakistan (@divamagazinepakistan)

ان کی شادی سے متعلق خبریں تھیں کہ ان کی شادی کی تقریبات دبئی میں ہوئیں جب کہ بعض تقریبات کراچی میں بھی ہوئی تھیں لیکن اس حوالے سے نیلم منیر کی جانب سے کوئی وضاحت نہیں دی گئی تھی۔

نیلم منیر نے اپنے شوہر کے حوالے سے بھی کوئی معلومات فراہم نہیں کی تاہم انہوں نے شوہر کے ہمراہ تصاویر شیئر کی تھیں، جن میں ان کے شوہر کو عرب لباس میں دیکھا گیا۔

شادی کے بعد اداکارہ نے جنوری کے آخر میں انسٹاگرام پر اپنی تصویر شیئر کرتے ہوئے کام پر واپسی کا اعلان کیا تھا اور اب انہوں نے شوبز چھوڑنے کی خبروں کی بھی تردید کی ہے۔