عمرہ پر جانیوالی مریم نواز کا مہنگا بیگ موضوع بحث بن گیا

وزیراعلیٰ پنجاب مریم نواز عمرہ ادائیگی کے لیے سعودی عرب میں موجود ہیں تاہم روحانی سفر کے بجائے ان کا مہنگا ہینڈ بیگ سوشل میڈیا پر موضوع بحث بن گیا ہے۔

مریم نواز کو جاتی امرا سے روانگی کے موقع پر سیاہ عبایہ اور چشمہ پہنے دیکھا گیا جب کہ وہ ان کے ہاتھ میں ایک مہنگا ہینڈ بیگ بھی تھا جو سوشل میڈیا صارفین کی توجہ کا مرکز بنا۔

رپورٹ کے مطابق یہ بیگ ہرمیس برانڈ کا ہے، جو ایک فرانسیسی لگژری کمپنی ہے۔ اس کمپنی کے بیگز دنیا بھر میں مشہور ہیں اور ان کی قیمت لاکھوں روپے ہوتی ہے۔

ماہرین کے مطابق مریم نواز کا یہ ہینڈ بیگ 20 ہزار ڈالر (تقریباً 56 لاکھ پاکستانی روپے) سے زائد بنتی ہے۔

جب مذکورہ بیگ کی تصاویر سوشل میڈیا پر وائرل ہوئیں سوشل میڈیا صارفین نے آپس میں اس پر بحث شروع کردی۔

کچھ لوگوں کا کہنا تھا کہ عمرہ کے دوران اتنا مہنگا بیگ لے جانا مناسب نہیں جبکہ بعض صارفین نے کہا کہ مہنگا بیگ استعمال کرنا مریم نواز کی ذاتی پسند ہے اور اس پر تنقید کرنا غلط ہے۔

ایک اور صارف نے کہا کہ جب ملک میں غربت اور مہنگائی ہو تو سیاستدانوں کو ایسی مہنگی چیزیں استعمال نہیں کرنی چاہئیں۔