پرفیوم کے نام نے رجب بٹ کو کس کیس میں پھنسوا دیا؟

معروف وی لاگر رجب بٹ کو اپنا پرفیوم برانڈ "295” کرنا مہنگا پڑ گیا ہے اور اس اقدام پر سوشل میڈیا صارفین بھی یوٹیوبر کو آڑے ہاتھوں لے رہے ہیں۔

رجب بٹ کے خلاف متنازع پرفیوم برانڈ کا نام رکھنے پر پریوینشن آف الیکٹرانک کرائمز ایکٹ (پیکا) 2016 کے تحت مقدمہ درج کیا گیا۔

بتایا جا رہا ہے کہ یہ تنازع اس پرفیوم کے نام پر سامنے آیا، جس میں پاکستان پینل کوڈ کی دفعہ 295 کا حوالہ دیا گیا ہے، مذکورہ قانون توہین مذہب اور مذہبی عقائد یا رسول اللہ صلی اللہ علیہ وسلم کی توہین کرنے پر سزا سے متعلق ہے۔

یہ قانون تین ذیلی دفعات پر مشتمل ہے، جن میں 295-اے (کسی بھی طبقے کے مذہب یا مذہبی عقائد کی توہین کرکے اس کے مذہبی جذبات کو مجروح کرنے کے ارادے سے جان بوجھ کر اور بدنیتی پر مبنی اقدامات)، 295-بی (قرآن پاک کی بے حرمتی وغیرہ) اور 295-سی (آنحضرت صلی اللہ علیہ وسلم کے بارے میں توہین آمیز تبصرے وغیرہ کا استعمال) پاکستان میں انتہائی حساس سمجھا جاتا ہے۔

رجب بٹ نے اس نمبر کو اپنے پرفیوم برانڈ کے لیے استعمال کر کے تنقید کا طوفان برپا کر دیا اور بہت سے لوگوں نے ان پر اسلامی اقدار کی توہین کا الزام عائد کیا۔

ردعمل کے جواب میں، رجب کے خلاف لاہور کے نشتر تھانے میں ایک اور ایف آئی آر درج کی گئی جس میں ان پر جذبات کو ٹھیس پہنچانے کا الزام لگایا گیا۔

یوٹیوبر نے ایک بیان میں معافی مانگتے ہوئے کہا کہ انہوں نے کبھی بھی اس قانون کی خلاف ورزی نہیں سوچا اور وہ اس پرفیوم برانڈ کو بند کردیں گے۔

دلچسپ بات یہ ہے کہ رجب نے دعویٰ کیا کہ اس پرفیوم کا نام دراصل بھارتی گلوکار سدھو موسیوالا کے گانے ‘295’ کے نام پر رکھا گیا تھا اور اس کا مقصد پاکستان کے توہین مذہب کے قانون کا حوالہ دینا نہیں تھا۔