پاکستانی اداکار علی خان دل کا دورہ پڑنے سے انتقال کرگئے

پاکستانی فلم انڈسٹری کے معروف اداکار علی خان دل کا دورہ پڑنے کے باعث انتقال کر گئے۔

میڈیا رپورٹس کے مطابق علی خان کی طبیعت اچانک خراب ہوئی تھی، جس کے بعد انہیں فوری طور پر قریبی اسپتال منتقل کیا گیا۔ وہاں وہ تقریباً دو گھنٹے ایمرجنسی میں زیر علاج رہے، تاہم ڈاکٹرز ان کی جان نہ بچا سکے۔

بتایا جاتا ہے کہ اداکار اپنی ناساز طبیعت کے باوجود داتا دربار حاضری کے لیے روانہ ہوئے تھے۔ اسی دوران راستے میں ان کی طبیعت مزید بگڑ گئی اور انہیں دل کا شدید دورہ پڑا۔ وہ موقع پر ہی گر پڑے، جس کے بعد انہیں فوری اسپتال لے جایا گیا۔

انتقال کے بعد ان کی میت کو ان کے آبائی شہر گوجرانوالہ منتقل کیا گیا، جہاں اہل خانہ اور عزیز و اقارب کی موجودگی میں ان کی تدفین کر دی گئی۔