ڈاکٹر نبیہہ علی خان اور حارث کھوکھر کے درمیان طلاق ہوگئی؟ وائرل خبروں کی حقیقت سامنے آگئی

سوشل میڈیا انفلوئنسر ڈاکٹر نبیہہ علی خان نے اپنے شوہر حارث کھوکھر سے طلاق سے متعلق گردش کرتی خبروں کی سختی سے تردید کرتے ہوئے کہا کہ ان کے درمیان کچھ اختلافات ضرور ہیں، لیکن طلاق کا کوئی نوٹس نہیں بھیجا گیا۔

ڈاکٹر نبیہہ علی خان نے کہا کہ سوشل میڈیا پر چلنے والی افواہیں بے بنیاد ہیں اور وہ امید رکھتی ہیں کہ جلد دونوں کے درمیان معاملات بہتر ہو جائیں گے۔ ذاتی زندگی کے مسائل کو سوشل میڈیا پر اچھالنا درست نہیں۔

حال ہی میں ایک انٹرویو کے دوران جب ان سے زندگی کی بڑی غلطی کے بارے میں سوال کیا گیا تو انہوں نے اس کا جواب دینے سے گریز کیا۔ بعد میں میزبان کے تبصرے کے بعد سوشل میڈیا پر قیاس آرائیاں شروع ہو گئیں کہ شاید یہ بات ان کی شادی سے متعلق ہے۔

حارث کھوکھر کی جانب سے مختلف بیانات کے بعد دونوں کے درمیان علیحدگی کی افواہیں مزید تیز ہو گئیں۔ تاہم ڈاکٹر نبیہہ نے اپنے یوٹیوب چینل پر وضاحت دیتے ہوئے کہا کہ انہوں نے کبھی اپنے شوہر کے خلاف کوئی بات نہیں کی۔

انہوں نے کہا کہ وہ پہلے بھی اپنے رشتے کو بچانے کی کوشش کرتی رہی ہیں اور اب بھی چاہتی ہیں کہ معاملات بات چیت سے حل ہوں۔ غلط خبروں کی وجہ سے ان کی ذاتی زندگی متاثر ہو رہی ہے۔

ڈاکٹر نبیہہ نے میڈیا اور سوشل میڈیا صارفین سے اپیل کی کہ وہ غیر مصدقہ خبروں اور گمراہ کن مواد سے گریز کریں۔ اگر کوئی مسئلہ ہے تو اس کا حل سوشل میڈیا نہیں بلکہ باہمی بات چیت ہے۔

انہوں نے کہا کہ طلاق سے متعلق خبروں میں کوئی صداقت نہیں اور اگر ایسا کوئی معاملہ ہوا تو وہ خود سب کو آگاہ کریں گی۔