گاڈزیلا فلموں کی مقبول اداکارہ کیلی ہوٹل ٹریفک حادثے میں چل بسیں

گاڈزیلا فلموں کی مقبول اداکارہ کیلی ہوٹل 18 سال کی عمر میں ٹریفک حادثے میں چل بسیں۔

ہالی ووڈ فلم سیریز گاڈزیلا میں جیا کا کردار ادا کرکے شہرت حاصل کرنے والی نوجوان اداکارہ کیلی ہوٹل 18 برس کی عمر میں ٹریفک حادثے میں انتقال کر گئیں۔ ان کی اچانک موت کی خبر نے مداحوں اور فلمی دنیا کو افسردہ کر دیا ہے۔

امریکی میڈیا رپورٹس کے مطابق کیلی ہوٹل ریاست میری لینڈ میں پیش آنے والے ایک کار حادثے میں جان کی بازی ہار گئیں۔ ان کے والد جوشوا ہوٹل نے بیٹی کے انتقال کی تصدیق کی۔ Texas School for the Deaf کی جانب سے بھی سوشل میڈیا پر جاری بیان میں اداکارہ کی موت کی خبر کی تصدیق کی گئی۔

ادارے نے اپنے بیان میں کیلی ہوٹل کے اہلِ خانہ، دوستوں اور ساتھی طلبہ سے دلی تعزیت کا اظہار کیا۔ اسکول انتظامیہ نے عوام سے اپیل کی کہ حادثے کی وجوہات کے حوالے سے غیر مصدقہ اطلاعات اور قیاس آرائیوں سے گریز کیا جائے۔ بیان میں خاندان کی نجی زندگی کا احترام کرنے پر بھی زور دیا گیا۔

کیلی ہوٹل نے 2021 میں ریلیز ہونے والی فلم Godzilla vs. Kong میں جیا نامی ایک بہری یتیم بچی کا کردار ادا کیا تھا۔ اس فلم کے ذریعے انہیں عالمی سطح پر پہچان ملی۔ فلم میں جیا اور دیوہیکل کردار کونگ کے درمیان دکھایا گیا جذباتی تعلق شائقین کو بہت پسند آیا۔

اداکارہ نے ایک انٹرویو میں بتایا تھا کہ فلم کے دوران بولے جانے والے مکالموں کو امریکی اشاروں کی زبان، یعنی ASL میں منتقل کرنا ان کے لیے ایک بڑا چیلنج تھا۔ ان کے مطابق اشاروں کی زبان میں جملوں کی ترتیب عام بول چال سے مختلف ہوتی ہے۔ اس لیے اسکرپٹ کو درست انداز میں ASL میں ڈھالنے کے لیے انہیں خاص محنت کرنا پڑی۔

کیلی ہوٹل نے بتایا تھا کہ انہیں اسکرپٹ یاد کرنے یا اشاروں کی زبان میں اداکاری کرنے میں مشکل پیش نہیں آئی۔ اصل مسئلہ بولے جانے والے جملوں کو ASL کے درست انداز میں منتقل کرنا تھا۔ بعض مواقع پر اشاروں کے ترجمے کو لے کر پروڈیوسرز اور ہدایت کاروں کے درمیان غلط فہمی بھی پیدا ہوئی، جس کے باعث فلم کی شوٹنگ میں تاخیر ہوئی۔ تاہم بعد میں یہ معاملہ حل کر لیا گیا۔

نوجوان اداکارہ نے 2024 میں ریلیز ہونے والی فلم Godzilla x Kong: The New Empire میں بھی جیا کا کردار دوبارہ ادا کیا۔ ان کی اداکاری کو شائقین کی جانب سے سراہا گیا۔ انہیں اسی کردار پر Saturn Awards میں بہترین نوجوان اداکارہ کی نامزدگی بھی ملی تھی۔

کیلی ہوٹل کا تعلق ایک ایسے خاندان سے تھا جس میں کئی نسلوں سے افراد سماعت سے محروم رہے ہیں۔ یہی وجہ تھی کہ جیا کا کردار ان کی اپنی زندگی اور ثقافتی پس منظر سے بھی خاص تعلق رکھتا تھا۔ انہوں نے اشاروں کی زبان کو فلم میں مؤثر انداز سے استعمال کرکے اپنے کردار کو مزید حقیقت کے قریب بنا دیا تھا۔