عالمی جمہوریت انڈیکس میں مسلسل تنزلی، پاکستان غیر جمہوری ملک قرار

اکانومسٹ انٹیلی جنس یونٹ (ای آئی یو) کے نئے ڈیموکریسی انڈیکس میں دعویٰ کیا گیا ہے کہ پاکستان کی جمہوریت کی درجہ بندی 2023 کی 3.25 سے گر کر 2024 میں 2.84 ہو گئی ہے۔

گلوبل ڈیموکریسی رینکنگ کی رپورٹ کے مطابق پاکستان میں 8 فروری 2024 کو پولنگ کے دن تشدد دیکھنے میں آیا۔

ای آئی یو کے مطابق مقبول ترین سیاستدان بانی پی ٹی آئی جن کی اپنی جمہوری ساکھ مشکوک ہے، انہیں انتخابات سے کچھ دیر قبل جیل بھیج دیا گیا۔

خیال رہے کہ فری اینڈ فیئر الیکشن نیٹ ورک (فافن) کے مطابق 2024 کے عام انتخابات میں پاکستان کی تاریخ میں سب سے زیادہ ووٹ ڈالے گئے تھے۔

تاہم، پولنگ کے دن سے پہلے اور بعد کے واقعات نے ملک میں جمہوری حقوق اور آزادی پر سوالات اٹھائے۔

ہیومن رائٹس کمیشن آف پاکستان (ایچ آر سی پی) کی جانب سے عام انتخابات کے قابل اعتبار ہونے کے حوالے سے بھی خدشات کا اظہار کیا گیا۔

ایچ آر سی پی کے انتخابی مبصرین نے 51 حلقوں میں سائٹ پر معائنہ کرتے ہوئے نمایاں مسائل کا مشاہدہ کیا۔ پولنگ کے دن ملک بھر میں انٹرنیٹ کی بندش کے ساتھ ساتھ پولنگ کی معلومات میں غیر منصوبہ بند تبدیلیاں دیکھنے میں آئیں جس سے رائے دہندگان کی پولنگ اسٹیشنوں کا پتہ لگانے کی صلاحیت خطرے میں پڑ گئی۔

مزید برآں ریٹرننگ افسران کی جانب سے انتخابی نتائج کے اعلان میں طویل تاخیر بھی ایک مسئلہ بن کر ابھری۔

پولنگ کے بعد کے عمل کو غیر تسلی بخش قرار دیا گیا۔ ایچ آر سی پی کی جانب سے دیکھے گئے تمام پولنگ اسٹیشنز میں سے پانچویں میں پریزائیڈنگ افسر نے ووٹوں کی گنتی کا بیان عوامی نمائش کے لیے کسی مخصوص جگہ پر چسپاں نہیں کیا اور نہ ہی ریٹرننگ افسر اور الیکشن کمیشن آف پاکستان (ای سی پی) کو نتائج کی تصویر بھیجتے ہوئے دیکھا گیا۔

کئی معاملوں میں یہ الزام لگایا گیا تھا کہ ریٹرننگ افسر کا اعلان پریزائیڈنگ افسر کی گنتی سے مطابقت نہیں رکھتا تھا۔

تشویش ناک بات یہ ہے کہ امیدواروں، پولنگ ایجنٹوں اور مبصرین کو نتائج کے عبوری استحکام کو دیکھنے کی اجازت دینے سے انکار کی خبریں بھی سامنے آئیں۔

کچھ پولنگ اسٹیشنوں پر ووٹوں کی ہیرا پھیری کے واضح اشارے بھی ملے، جہاں ووٹوں کا تبادلہ کیا گیا۔

رپورٹ کے مطابق مسلسل 16 ویں سال ناروے کو 9.81 اسکور کے ساتھ دنیا کا سب سے جمہوری ملک قرار دیا گیا۔ اس کے بعد نیوزی لینڈ اور سویڈن ہیں۔

اس کے متوازی، افغانستان 2021 کے بعد سے سب سے کم درجہ بندی والا ملک رہا ہے، جس نے صرف 0.25 پوائنٹس حاصل کیے جب کہ سب سے بڑی تبدیلی بنگلہ دیش سے آئی جس میں 25 درجے کی گراوٹ آئی۔