ایک ہی سال میں دو بار رمضان؟ ماہرین فلکیات کی حیران کن پیشگوئی سامنے آگئی

ماہرین فلکیات کا کہنا ہے کہ سن 2030 میں مسلمان ایک نایاب موقع دیکھیں گے، جب رمضان المبارک ایک ہی عیسوی سال میں دو بار آئے گا۔ اس کا سبب اسلامی قمری کیلنڈر اور عیسوی شمسی کیلنڈر کے درمیان موجود فرق ہے۔

اسلامی کیلنڈر چاند کی گردش کے مطابق ہوتا ہے اور اس کا سال تقریباً 354 دنوں پر مشتمل ہوتا ہے، جو عیسوی سال سے 10 تا 11 دن کم ہے۔ اسی وجہ سے رمضان ہر سال تقریباً 10 سے 11 دن پہلے آتا ہے۔

ماہرین کے مطابق 2030 میں رمضان کی پہلی شروعات 5 جنوری (اسلامی سال 1451 ہجری) کو ہوگی، جبکہ دوسری بار 26 دسمبر (اسلامی سال 1452 ہجری) کو شروع ہوگا۔ اس طرح مسلمان اس سال میں مجموعی طور پر 36 روزے رکھیں گے، جن میں جنوری کے 30 اور دسمبر کے 6 روزے شامل ہوں گے۔

یہ نایاب واقعہ تقریباً ہر 33 سال بعد پیش آتا ہے۔ اس سے قبل یہ موقع 1997 میں آیا تھا اور اگلی بار 2063 میں آئے گا۔ رمضان المبارک میں فجر سے غروب آفتاب تک روزہ رکھنا فرض ہے، جو عبادت، صبر اور روحانی پاکیزگی کا ذریعہ سمجھا جاتا ہے۔ روزے کا دورانیہ موسم کے مطابق مختلف ہوتا ہے؛ سردیوں میں کم اور گرمیوں میں بعض جگہوں پر 17 گھنٹے سے زیادہ بھی ہو سکتا ہے۔

اگرچہ رمضان کی ابتدا فلکیاتی حساب سے بھی ممکن ہے، مگر بیشتر اسلامی ممالک ہلال دیکھنے کی روایت پر عمل کرتے ہیں۔ سعودی عرب سمیت کئی ممالک انسانی رویتِ ہلال کو مقدم رکھتے ہیں، جبکہ بعض ممالک سائنسی طریقے بھی استعمال کرتے ہیں۔