سرکاری نوکری کے خواہشمند افراد کے لیے بڑی خبر آگئی

بلوچستان میں سرکاری بھرتیوں کے نظام میں ایک بڑی اور تاریخی تبدیلی سامنے آئی ہے۔

بلوچستان کی تاریخ میں پہلی مرتبہ سرکاری آسامیوں پر آن لائن ٹیسٹ لے کر صرف ایک گھنٹے کے اندر تقرری لیٹر جاری کیے گئے ہیں۔ یہ اقدام شفافیت اور میرٹ کے فروغ کی جانب ایک اہم قدم قرار دیا جا رہا ہے۔

محکمہ خزانہ میں 111 خالی سرکاری آسامیوں پر بھرتیوں کا عمل شروع کر دیا گیا ہے۔ تمام تقرریاں مکمل طور پر میرٹ کی بنیاد پر کی جا رہی ہیں۔ امیدواروں کو کسی دفتری کارروائی کے بجائے آن لائن نظام کے ذریعے ٹیسٹ دینا پڑا، جس سے سفارش اور غیر قانونی طریقوں کا راستہ بند کیا گیا۔

وزیراعلیٰ بلوچستان سرفراز بگٹی نے اس موقع پر کہا کہ صوبائی حکومت نے شفاف اور پیپر لیس بھرتیوں کا عملی آغاز کر دیا ہے۔ ان کے مطابق محکمہ خزانہ کو بطور پائلٹ پروجیکٹ منتخب کیا گیا ہے، جبکہ آئندہ مرحلوں میں یہی نظام دیگر محکموں میں بھی نافذ کیا جائے گا۔

حکام کا کہنا ہے کہ آن لائن ٹیسٹ کے نتائج فوری طور پر مرتب کیے گئے اور کامیاب امیدواروں کو صرف ایک گھنٹے کے اندر تقرری لیٹر فراہم کر دیے گئے۔ اس عمل نے نہ صرف وقت بچایا بلکہ اعتماد کو بھی بحال کیا ہے۔

وزیراعلیٰ نے واضح کیا کہ حکومت کسی صورت نوکریوں کی خرید و فروخت، کرپشن یا اقربا پروری کو برداشت نہیں کرے گی۔ انہوں نے کہا کہ عوام سے کیے گئے وعدوں کی تکمیل حکومت کی اولین ترجیح ہے اور اسی لیے نظام میں عملی اصلاحات متعارف کروائی جا رہی ہیں۔