کراچی: استاد کے مبینہ تشدد سے زخمی بچہ جاں بحق

کراچی کے علاقے منگھوپیر میں مدرسے میں سر پر ڈنڈا لگنے سے شدید زخمی ہونے والا چھ سالہ طالب علم حسن علاج کے دوران انتقال کر گیا۔

خاندانی ذرائع کے مطابق حسن کو گزشتہ ماہ مدرسے کے ایک معلم نے مبینہ طور پر ڈنڈا مارا تھا، جس کے باعث وہ بری طرح زخمی ہو گیا۔ ابتدائی علاج کے بعد بچے کو اسپتال سے گھر بھیج دیا گیا تھا، تاہم کچھ دن گزرنے کے بعد اس کی حالت دوبارہ بگڑ گئی۔

بچے کے والد نے بتایا کہ طبیعت خراب ہونے پر حسن کو دوبارہ اسپتال منتقل کیا گیا، جہاں سے اسے جناح اسپتال سے قومی ادارہ برائے امراضِ اطفال (NICH) ریفر کیا گیا، لیکن ڈاکٹرز کی کوششوں کے باوجود وہ جانبر نہ ہو سکا۔

والد کے مطابق معالجین نے بتایا کہ بچے کے پھیپھڑوں نے کام کرنا چھوڑ دیا تھا، جس کے باعث اس کی جان نہ بچائی جا سکی۔