موٹر سائیکل سواروں کیلئے بڑی خبر آگئی

ملک میں پٹرولیم مصنوعات کی بڑھتی ہوئی قیمتوں کے پیش نظر حکومت نے عوام کو ریلیف دینے کے لیے اہم اقدامات شروع کر دیے ہیں۔

ذرائع کے مطابق وفاقی اور صوبائی حکومتوں کے درمیان بڑے پیمانے پر مشاورت جاری ہے۔ اس کا مقصد چھوٹے کاشتکاروں اور کم آمدنی والے افراد کو مالی سہولت دینا ہے۔

ابتدائی تجویز کے مطابق 5 ایکڑ تک زمین رکھنے والے کسانوں کو ڈیزل پر سبسڈی دی جائے گی۔ حکومت کی جانب سے فی ایکڑ تقریباً 1500 روپے سبسڈی دینے پر غور کیا جا رہا ہے۔ یہ رقم براہ راست کسانوں کے والٹ اکاؤنٹس میں منتقل کی جائے گی۔

اس کے ساتھ ساتھ موٹر سائیکل سواروں اور رکشہ ڈرائیورز کے لیے بھی سبسڈی دینے کی تجویز زیر غور ہے۔ صوبائی حکومتیں اس سلسلے میں براہ راست مالی مدد فراہم کریں گی۔

ذرائع کا کہنا ہے کہ اس ریلیف پیکج کا باضابطہ اعلان وفاقی حکومت کرے گی۔ تاہم اس کے لیے تقریباً 150 ارب روپے کی رقم صوبے اپنے بجٹ سے فراہم کریں گے۔

سبسڈی کی تقسیم کا طریقہ کار وفاق طے کرے گا، جبکہ اس پر عملدرآمد صوبائی حکومتیں کریں گی۔

وزارت خزانہ کے ذرائع کے مطابق پنجاب اور سندھ میں کسانوں کا مکمل ڈیٹا پہلے سے موجود ہے۔ خیبرپختونخوا میں بھی تقریباً 15 لاکھ کسانوں کو اس اسکیم سے فائدہ پہنچنے کا امکان ہے۔

حکومت کا کہنا ہے کہ یہ اقدام خطے میں بڑھتی کشیدگی اور ممکنہ مہنگائی کے اثرات کو کم کرنے کے لیے کیا جا رہا ہے، تاکہ عام آدمی کو کچھ ریلیف مل سکے۔