کیا کراچی میں اب بارش کا امکان ہے؟ محکمہ موسمیات نے بتادیا

محکمہ موسمیات نے کراچی اور سندھ کے شہریوں کے لیے موسم سے متعلق اہم پیشگوئی جاری کر دی ہے۔

محکمہ موسمیات کے مطابق فی الحال کراچی سمیت سندھ کے کسی بھی علاقے میں بارش کا امکان نہیں ہے۔ آنے والے دنوں میں موسم زیادہ تر خشک اور گرم رہنے کی توقع ہے۔

محکمہ موسمیات کا کہنا ہے کہ مغربی ہواؤں کا نیا سسٹم ملک کے بالائی علاقوں کا رخ کرے گا، جس کی وجہ سے سندھ اس کے اثرات سے زیادہ متاثر نہیں ہوگا۔ اسی وجہ سے کراچی اور دیگر شہروں میں بارش کی کوئی خاص توقع نہیں رکھی جا رہی۔

رپورٹ میں بتایا گیا ہے کہ 10 اپریل سے کراچی میں درجہ حرارت میں بتدریج اضافہ شروع ہوگا۔ درجہ حرارت 34 ڈگری سینٹی گریڈ یا اس سے بھی زیادہ جا سکتا ہے۔ دن کے اوقات میں گرمی کی شدت میں اضافہ محسوس کیا جائے گا، جس سے شہریوں کو احتیاط کی ضرورت ہوگی۔

محکمہ موسمیات نے خبردار کیا ہے کہ اپریل کے آخری دنوں میں ہیٹ ویو آنے کا امکان بھی موجود ہے۔ اس دوران درجہ حرارت معمول سے زیادہ بڑھ سکتا ہے اور شدید گرمی پڑ سکتی ہے۔ شہریوں کو ہدایت کی گئی ہے کہ دھوپ میں غیر ضروری نکلنے سے گریز کریں اور پانی کا زیادہ استعمال کریں۔