تیل کی قیمتوں میں اضافہ؛ پاکستانی عازمین حج کیلئے کرایوں سے متعلق اہم خبر

وزارت مذہبی امور نے حج 2026 سے متعلق اہم اعلان کرتے ہوئے عازمین کے لیے بڑی سہولت کی خبر دی ہے۔

حکام کے مطابق عالمی سطح پر تیل کی قیمتوں میں اضافے کے باوجود پاکستانی حجاج کے فضائی کرایوں میں کوئی اضافہ نہیں کیا جائے گا۔ اس فیصلے سے ہزاروں عازمین کو مالی ریلیف ملے گا۔

وفاقی وزیر مذہبی امور سردار محمد یوسف اپنے دورہ سعودی عرب کے دوران ریاض پہنچے، جہاں ان کا استقبال پارٹی عہدیداروں اور کمیونٹی کے افراد نے کیا۔ اس موقع پر انہوں نے حج انتظامات کے حوالے سے تفصیل بیان کی اور کہا کہ حج 2026 کی تیاری مکمل کر لی گئی ہے۔

انہوں نے کہا کہ پاکستانی عازمین کی سعودی عرب روانگی 18 اپریل سے شروع ہوگی۔ مکہ مکرمہ اور مدینہ منورہ میں رہائش، کھانے پینے اور سفری سہولیات کے بہتر انتظامات کیے گئے ہیں۔ اس سال خصوصی توجہ اس بات پر دی گئی ہے کہ عازمین کو زیادہ سے زیادہ آسانی فراہم کی جائے۔

وزیر مذہبی امور کے مطابق پہلی بار 25 ہزار سے زائد پاکستانی عازمین کو حرمین ٹرین کے ذریعے سفر کی سہولت دی جائے گی۔ اس سے مکہ اور مدینہ کے درمیان سفر تیز اور آرام دہ ہو جائے گا۔ اس کے علاوہ ایام حج کے دوران منیٰ، مزدلفہ اور عرفات میں بھی بہتر سہولیات فراہم کی جائیں گی۔

انہوں نے کہا کہ سعودی وزارت حج و عمرہ کے تعاون سے تمام انتظامات مکمل کیے جا رہے ہیں۔ موجودہ حالات کے باوجود حج آپریشن کو کامیابی سے مکمل کیا جائے گا۔

وزیر نے واضح کیا کہ حکومت نے ایئرلائنز کے ساتھ پہلے ہی معاہدہ کر لیا ہے۔ اس کے تحت عازمین کو طے شدہ پیکیج کے مطابق ہی سفر کروایا جائے گا۔ اس لیے فضائی کرایوں میں اضافے کی کوئی گنجائش نہیں رکھی گئی۔