پنجاب میں مفت ٹرانسپورٹ اسکیم کامیاب، مسافروں کی تعداد میں ریکارڈ اضافہ

لاہور: پنجاب میں مفت ٹرانسپورٹ اسکیم کو عوامی سطح پر غیر معمولی پذیرائی حاصل ہوئی ہے، جہاں فری سفر کے دنوں میں مسافروں کی تعداد میں ریکارڈ 60 فیصد اضافہ دیکھا گیا ہے۔ اس پیش رفت کو عوامی سہولت کے ایک اہم سنگ میل کے طور پر دیکھا جا رہا ہے۔

وزیراعلیٰ پنجاب مریم نواز کے مطابق مفت سروس کے باعث نہ صرف پبلک ٹرانسپورٹ کے استعمال میں نمایاں اضافہ ہوا ہے بلکہ شہریوں کو روزمرہ سفر میں بھی بڑی آسانی میسر آئی ہے۔ انہوں نے کہا کہ ادائیگی والے دنوں کے مقابلے میں مفت دنوں میں مسافروں کی تعداد میں واضح اضافہ سامنے آیا ہے۔

مریم نواز کا کہنا تھا کہ موجودہ ٹرانسپورٹ سسٹم اپنی مکمل گنجائش تک پہنچ چکا ہے، جس کے پیش نظر مزید ایک ہزار بسیں شامل کرنے کا فیصلہ کیا گیا ہے تاکہ بڑھتی ہوئی طلب کو پورا کیا جا سکے۔

حکام کے مطابق اس اقدام سے شہریوں کو سستا اور سہل سفر فراہم ہوا ہے، جبکہ ٹریفک کے دباؤ میں بھی کمی متوقع ہے۔ حکومت کا کہنا ہے کہ مستقبل میں اس سہولت کو مزید بہتر بنانے کے لیے اقدامات جاری رکھے جائیں گے۔