خبردار!! کرائے پر رہنے والے شہریوں سے متعلق حکومت کا اچانک بڑا فیصلہ

بلوچستان حکومت نے صوبے میں سیکیورٹی صورتحال کو بہتر بنانے کے لیے کرایہ داروں کی رجسٹریشن کو لازمی قرار دے دیا ہے۔ اب کسی بھی فرد کو شناختی کارڈ کے بغیر کرایہ پر مکان نہیں دیا جا سکے گا۔

حکومتی اعلامیے کے مطابق تمام مکان مالکان کو پابند کیا گیا ہے کہ وہ اپنے کرایہ داروں کا مکمل ریکارڈ متعلقہ تھانے میں جمع کروائیں۔ اس کے علاوہ ہاسٹلز، گیسٹ ہاؤسز اور ہوٹلز کو بھی اپنے مہمانوں کا مکمل ڈیٹا محفوظ رکھنے کی ہدایت دی گئی ہے تاکہ کسی بھی غیر قانونی سرگرمی کی بروقت نشاندہی ممکن ہو سکے۔

انتظامیہ نے کہا ہے کہ اگر کوئی مہمان 24 گھنٹے سے زیادہ قیام کرتا ہے تو اس کی اطلاع بھی متعلقہ اداروں کو دینا ضروری ہوگا۔ یہ اقدام صوبے میں امن و امان کو مضبوط بنانے کے لیے کیا گیا ہے۔

حکام نے خبردار کیا ہے کہ ان احکامات کی خلاف ورزی پر سخت کارروائی کی جائے گی، جس میں مقدمہ درج ہونا، گرفتاری اور حتیٰ کہ جائیداد سیل کرنے جیسے اقدامات بھی شامل ہو سکتے ہیں۔

حکومت نے عوام سے اپیل کی ہے کہ وہ کرایہ داری کے قوانین پر مکمل عمل کریں اور تمام معلومات درست طریقے سے فراہم کریں۔ مکان مالکان کو ہدایت کی گئی ہے کہ وہ صرف زبانی معاہدوں پر انحصار نہ کریں بلکہ ہر کرایہ دار کا تحریری ریکارڈ رکھیں۔

اس میں شناختی کارڈ کی کاپی، مستقل پتہ، موبائل نمبر اور ضرورت پڑنے پر ضامن کی تفصیلات شامل کرنے کی بھی ہدایت دی گئی ہے۔ کرایہ داری کے آغاز اور اختتام کی تاریخ بھی ریکارڈ میں درج کرنا لازمی قرار دیا گیا ہے تاکہ کسی بھی تحقیقاتی عمل میں آسانی ہو۔