جرمن سفیر کی فہد ہارون سے ملاقات، ڈیجیٹل میڈیا چیلنجز اور مواقع پر تبادلہ خیال

اسلام آباد: جرمنی کی سفیر محترمہ اِنا لیپل نے وزیر مملکت و وزیراعظم کے معاون خصوصی برائے ڈیجیٹل میڈیا فہد ہارون سے ان کے دفتر میں ملاقات کی، جس میں ڈیجیٹل میڈیا سے متعلق اہم امور زیر بحث آئے۔

ملاقات کے دوران بدلتے ہوئے عالمی ڈیجیٹل منظرنامے پر گفتگو کی گئی، جہاں ابھرتے مواقع اور درپیش چیلنجز کا تفصیلی جائزہ لیا گیا۔ خاص طور پر جعلی خبروں اور گمراہ کن معلومات کے پھیلاؤ کو روکنے، آن لائن تحفظ کو بہتر بنانے اور ڈیجیٹل پلیٹ فارمز کے غیر قانونی استعمال کی روک تھام جیسے معاملات پر توجہ مرکوز رہی۔

دونوں فریقین نے اس بات پر اتفاق کیا کہ ڈیجیٹل میڈیا کے شعبے میں تعاون کو مزید بڑھایا جائے تاکہ مثبت اور محفوظ آن لائن ماحول کو فروغ دیا جا سکے۔

اس موقع پر جرمن سفارتخانے کے سربراہ برائے مواصلات، ثقافتی امور اور پروٹوکول یان جیرالڈ کراوسر بھی موجود تھے، جنہوں نے گفتگو میں حصہ لیا۔