سرکاری ملازمین اور افسران کیلئے بُری خبر؛ حکومت نے بڑا ریلیف ختم کر دیا

ملک میں توانائی کے شعبے سے متعلق ایک اہم فیصلہ سامنے آیا ہے جس کے تحت بجلی کے اداروں کے افسران کو دیے جانے والے مفت یونٹس ختم کر دیے گئے ہیں۔

وفاقی وزیر برائے توانائی اویس لغاری نے اس فیصلے کو عوامی مطالبے کی تکمیل قرار دیتے ہوئے کہا کہ عوام طویل عرصے سے اس سہولت کے خاتمے کا مطالبہ کر رہے تھے، اور اب حکومت نے اس پر عملی اقدام اٹھا لیا ہے۔ یہ فیصلہ شفافیت اور مساوات کی طرف ایک اہم پیش رفت ہے۔

وزیر توانائی نے کہا کہ حکومت ایسے تمام اقدامات جاری رکھے گی جو ملکی معیشت اور عوامی مفاد میں ہوں۔ توانائی کے شعبے میں اصلاحات کا مقصد نظام کو بہتر اور منصفانہ بنانا ہے تاکہ کسی بھی طبقے کو غیر ضروری مراعات نہ دی جائیں۔

دوسری جانب لاہور ہائی کورٹ نے بھی بجلی کمپنیوں کے افسران کو دیے جانے والے مفت یونٹس کے خاتمے کو قانونی طور پر درست قرار دیا ہے۔ عدالت نے واضح کیا کہ گریڈ 17 سے 22 تک کے افسران کو یہ سہولت ختم کرنا آئین کے خلاف نہیں ہے۔