نادرا موبائل وین سروس کا نیا شیڈول جاری، شناختی کارڈ گھر کے قریب بنوانے کی سہولت

اسلام آباد: نیشنل ڈیٹا بیس اینڈ رجسٹریشن اتھارٹی (نادرا) نے شہریوں کے لیے بڑی سہولت فراہم کرتے ہوئے موبائل وین رجسٹریشن سروسز کا نیا شیڈول جاری کر دیا ہے۔

اس اقدام کے تحت شہریوں کو اب شناختی کارڈ اور دیگر رجسٹریشن سہولیات کے لیے دفاتر جانے کی ضرورت نہیں ہوگی، بلکہ یہ خدمات ان کے قریبی علاقوں میں موبائل یونٹس کے ذریعے فراہم کی جائیں گی۔

جاری شیڈول اپریل 2026 کے مختلف دنوں پر مشتمل ہے، جس کے مطابق مخصوص علاقوں میں طے شدہ تاریخوں پر موبائل وینز تعینات ہوں گی۔

اسلام آباد زون میں موبائل وین سروس 20 اپریل سے 25 اپریل 2026 تک مختلف مقامات پر دستیاب ہوگی۔ ان سروسز کے ذریعے شہری نئے شناختی کارڈ کا اجراء، معلومات میں تصحیح اور دیگر رجسٹریشن سہولیات حاصل کر سکیں گے۔

اسی طرح راولپنڈی اور کشمیر زون کے لیے بھی یہی تاریخیں مقرر کی گئی ہیں، جہاں مختلف علاقوں میں موبائل وینز کے ذریعے شہریوں کو موقع پر ہی خدمات فراہم کی جائیں گی۔

نادرا حکام کے مطابق اس سروس کا بنیادی مقصد شہریوں کو ان کی دہلیز پر سہولت دینا، دفاتر میں رش کم کرنا اور دور دراز علاقوں کے لوگوں کے لیے آسان رسائی کو یقینی بنانا ہے۔

حکام نے شہریوں سے اپیل کی ہے کہ وہ اپنے علاقے اور مقررہ تاریخ کے مطابق موبائل وین سے رجوع کریں تاکہ خدمات بروقت اور منظم طریقے سے حاصل کی جا سکیں۔