اپنی چھت، اپنا گھر پروگرام میں درخواست دینے والوں کیلئے بڑی خبر آگئی

پنجاب حکومت کے فلیگ شپ منصوبے “اپنی چھت، اپنا گھر” کے حوالے سے ایک اور بڑی پیش رفت سامنے آئی ہے۔

 حکام کے مطابق مزید 12 ہزار مستحق خاندانوں کو جلد ہی بلاسود قرضوں کی فراہمی شروع کر دی جائے گی تاکہ وہ اپنے گھروں کی تعمیر مکمل کر سکیں۔

صوبائی وزیر ہاؤسنگ بلال یاسین نے بتایا کہ اس پروگرام کے تحت اب تک کم آمدنی والے خاندانوں کو 191 ارب روپے سے زائد کے بلاسود قرضے فراہم کیے جا چکے ہیں۔ یہ منصوبہ وزیراعلیٰ مریم نواز کے ویژن کے تحت جاری ہے۔

اجلاس میں صوبائی وزیر اور ڈی جی پنجاب ہاؤسنگ اینڈ ٹاؤن پلاننگ ایجنسی سکندر ذیشان نے پروگرام کی پیش رفت کا جائزہ لیا۔ اجلاس میں بتایا گیا کہ اب تک ایک لاکھ 35 ہزار سے زائد خاندان مالی مدد حاصل کر چکے ہیں۔

رپورٹ کے مطابق اس اسکیم کے تحت 91 ہزار سے زیادہ گھروں کی تعمیر مکمل ہو چکی ہے جبکہ تقریباً 42 ہزار گھر ابھی زیر تعمیر ہیں۔ ان گھروں کی تکمیل رواں مالی سال کے دوران متوقع ہے۔

حکام نے بتایا کہ اس پروگرام کے لیے عوام میں بہت زیادہ دلچسپی دیکھی گئی ہے اور اب تک 11 لاکھ 70 ہزار سے زائد درخواستیں موصول ہو چکی ہیں۔ یہ بات اسکیم کی مقبولیت کو ظاہر کرتی ہے۔

مالی نظم و ضبط کے حوالے سے بھی اہم پیش رفت سامنے آئی ہے۔ اب تک ماہانہ اقساط کی مد میں 10 ارب روپے سے زائد کی وصولی ہو چکی ہے، جو قرضوں کی بروقت واپسی اور منصوبے کی کامیابی کی علامت ہے۔