شیخ القرآن مولانا اشرف علی کا انتقال ہوگیا

دارالعلوم تعلیم القرآن راولپنڈی کے مہتمم جانشین شیخ القرآن مولانا اشرف علی کا انتقال ہوگیا۔

مولانا اشرف علی دینی تعلیم اور تربیت کے شعبے میں ایک نمایاں مقام رکھتے تھے۔ انہوں نے دارالعلوم تعلیم القرآن میں طویل عرصے تک خدمات انجام دیں اور ہزاروں طلبہ کو علم دین سے روشناس کروایا۔ ان کی سادہ طبیعت، نرم لہجہ اور علم سے محبت نے انہیں طلبہ اور اہل علم میں خاص مقام دلایا۔

جمعیت علمائے اسلام کے سربراہ مولانا فضل الرحمان نے بھی ان کے انتقال پر گہرے رنج و غم کا اظہار کیا، انہوں نے کہا کہ مولانا اشرف علی کی دینی خدمات کو ہمیشہ یاد رکھا جائے گا۔ اللہ تعالیٰ مرحوم کی مغفرت فرمائے اور ان کے درجات بلند کرے۔

مولانا فضل الرحمان نے کہا کہ مرحوم کی طویل بیماری ان کے لیے درجات کی بلندی کا سبب بنے۔ انہوں نے دارالعلوم تعلیم القرآن اور اس سے وابستہ خاندان کی خدمات کو بھی سراہا اور دعا کی کہ یہ سلسلہ اسی طرح جاری رہے۔