کراچی والوں کا پانی ایک بار پھر 48 گھنٹوں کیلیے بند

کراچی کے شہریوں کو ایک بار پھر پانی کی قلت کا سامنا کرنا پڑ رہا ہے۔ کراچی واٹر کارپوریشن کے مطابق شہر میں پانی کی فراہمی 48 گھنٹوں کے لیے عارضی طور پر بند رہے گی۔

ترجمان واٹر کارپوریشن نے بتایا کہ دھابیجی پمپنگ اسٹیشن پر نئی پانی کی لائن کو نیٹ ورک سے جوڑنے کا کام شروع کیا جا رہا ہے۔ اسی وجہ سے نظام کو جزوی طور پر بند کیا گیا ہے۔

اعلامیے کے مطابق پمپنگ اسٹیشن کے 9 میں سے 7 پمپس آئندہ 48 گھنٹوں تک بند رہیں گے۔ ان پمپس کی بحالی 27 اپریل کو متوقع ہے۔

مزید بتایا گیا ہے کہ 2 پمپس کو مزید 5 روز تک بند رکھا جائے گا تاکہ تکنیکی کام مکمل کیا جا سکے۔

اس دوران کراچی کے کئی بڑے علاقے متاثر ہوں گے۔ ان میں نارتھ کراچی، سرجانی ٹاؤن، اسکیم 33، گلستانِ جوہر، گلشنِ اقبال، صدر، لانڈھی اور کورنگی شامل ہیں۔

شہر کے تین بڑے واٹر ہائیڈرینٹس بھی بند رہیں گے۔ نیپا، صفورا اور سخی حسن ہائیڈرنٹس پر پانی کی فراہمی معطل رہے گی۔

واٹر کارپوریشن کے مطابق اس دوران شہر کو یومیہ تقریباً 250 ملین گیلن پانی کی کمی کا سامنا ہوگا۔

شہریوں کو ہدایت کی گئی ہے کہ پانی احتیاط سے استعمال کریں اور غیر ضروری ضیاع سے گریز کریں۔