نادرا نے عوام کی بڑی مشکل حل کردی

نادرا نے شہریوں کی سہولت کے لیے اپنی نئی اور جدید ویب سائٹ متعارف کروا دی ہے۔

 اب صارفین کو مختلف خدمات کے لیے الگ الگ پلیٹ فارمز پر جانے کی ضرورت نہیں ہوگی۔ تمام اہم سہولیات ایک ہی ویب سائٹ پر دستیاب ہوں گی، جس سے وقت اور محنت دونوں کی بچت ہوگی۔

شناختی کارڈ، نائیکوپ، پی او سی اور فیملی رجسٹریشن سرٹیفکیٹ جیسی تمام سروسز کو ایک پلیٹ فارم پر اکٹھا کر دیا گیا ہے۔ اس کے ساتھ ساتھ nGRIDS سسٹم کے ذریعے رجسٹریشن ڈیٹا کو نقشوں کی شکل میں پیش کیا گیا ہے۔ اس فیچر سے مختلف علاقوں کے اعدادوشمار کو سمجھنا اور تجزیہ کرنا آسان ہو گیا ہے۔

نئی ویب سائٹ پر ضلعی سطح پر مردم شماری اور رجسٹریشن کے اعدادوشمار کا تقابلی جائزہ بھی دیا گیا ہے۔ اس کے علاوہ ایک خصوصی میپ گیلری بھی شامل کی گئی ہے، جو تحقیق اور منصوبہ بندی کرنے والے افراد کے لیے مفید ثابت ہوگی۔ قومی اور صوبائی سطح کے اہم رجحانات بھی صارفین کے لیے دستیاب ہیں، جن سے پالیسی سازی میں مدد مل سکتی ہے۔

نادرا نے پیدائش، وفات، شادی اور طلاق کی رجسٹریشن کے نظام کو بھی مزید منظم انداز میں پیش کیا ہے۔ اس کے ساتھ بینکاری، ٹیلی کام اور دیگر سرکاری اداروں کے لیے تصدیقی خدمات کو بھی ایک جگہ جمع کر دیا گیا ہے۔ اس اقدام سے اداروں کے درمیان رابطہ بہتر ہوگا اور تصدیق کا عمل تیز ہو سکے گا۔

صارفین کی رہنمائی کے لیے کال سنٹر، آئی وی آر اور ای میل سپورٹ کو مزید مؤثر بنایا گیا ہے۔ شکایات درج کروانے اور ان کے حل کا نظام بھی بہتر کیا گیا ہے تاکہ عوام کو فوری ریلیف مل سکے۔ نادرا کے کیریئر پورٹل کو بھی اپ ڈیٹ کیا گیا ہے، جس کے ذریعے اب آن لائن درخواست دینا پہلے سے زیادہ آسان ہو گیا ہے۔

مزید برآں، ملک بھر اور بیرون ملک نادرا نیٹ ورک کی مکمل معلومات ویب سائٹ پر فراہم کی گئی ہیں۔ رجسٹریشن مراکز اور موبائل رجسٹریشن وین سے متعلق تفصیلات بھی ایک ہی جگہ دستیاب ہیں۔ رائٹ ٹو انفارمیشن اور میڈیا سینٹر کے سیکشنز کو بھی جدید تقاضوں کے مطابق بہتر بنایا گیا ہے، جس سے معلومات تک رسائی مزید آسان ہو گئی ہے۔