سندھ کابینہ کا اہم اجلاس، کراچی کی سڑکوں کے لیے اربوں روپے کی منظوری

مراد علی شاہ کی زیر صدارت صوبائی کابینہ نے پچیس نکاتی ایجنڈے پر غور کرتے ہوئے کراچی کی سڑکوں کی بحالی کے لیے ساڑھے چھ ارب روپے سمیت متعدد ترقیاتی منصوبوں کی منظوری دے دی ہے۔

وزیراعلیٰ سندھ سید مراد علی شاہ کی زیر صدارت منعقدہ صوبائی کابینہ کے اہم اجلاس میں کراچی کے انفراسٹرکچر کی بہتری اور صوبے بھر میں ترقیاتی کاموں کے لیے اربوں روپے کے فنڈز مختص کر دیئے گئے ہیں۔

اجلاس میں کراچی کو خصوصی اہمیت دیتے ہوئے شہر کی سڑکوں کی بحالی کے لیے چھ اعشاریہ پانچ ارب روپے کی بھاری رقم منظور کی گئی ہے۔

وزیراعلیٰ نے ہدایت کی کہ کراچی میونسپل کارپوریشن کے تحت چوبیس ٹاؤنز میں سڑکوں کی مرمت کا کام فوری شروع کیا جائے اور اس کے لیے فنڈز کی فراہمی میں کوئی تاخیر نہ کی جائے۔

اس کے علاوہ کراچی کے نکاسی آب کے بڑے منصوبے ’ایس تھری‘ کے لیے دو ارب روپے منظور کیے گئے، جس سے ہارون آباد میں پہلے مرحلے کی تکمیل ممکن ہوگی۔ تعلیمی شعبے میں سینٹ پیٹرک ہائی اسکول کراچی کے لیے نوے ملین روپے مختص کیے گئے۔

یہ بھی پڑھیں : سندھ کابینہ کے بڑے فیصلے، موٹر سائیکل فیول سبسڈی پروگرام میں توسیع

اجلاس میں حیدرآباد اور کوٹڑی کے درمیان دریائے سندھ پر نئے پل کے ڈیزائن کے لیے ایک سو سینتالیس ملین روپے کی منظوری دی گئی، جو اندرونِ ملک ٹریفک کے لیے بڑی سہولت ثابت ہوگا۔

لاڑکانہ میں نکاسی آب کے لیے چار ارب، سکھر میں پچاس بستروں کے ٹراما سینٹر کے لیے چھ سو پینتیس ملین اور عدالتی نظام کی ڈیجیٹلائزیشن کے لیے اڑتالیس ملین روپے مختص کیے گئے۔

کابینہ نے عمرکوٹ میں یتیم خانے کے قیام اور مورو میں نئی عدالتوں کی تعمیر کی بھی منظوری دی۔ ایک اہم فیصلے میں سیہون ڈویلپمنٹ اتھارٹی کی تنظیمِ نو کرتے ہوئے نئی بھرتیوں پر پابندی لگا دی گئی اور چار سو سے زائد ملازمین کو سرپلس پول میں بھیج دیا گیا۔

وزیراعلیٰ نے ٹیکنالوجی کے فروغ کے لیے ’انڈس اے آئی ویک دو ہزار چھبیس‘ کے انعقاد کی بھی منظوری دی، جو صوبے میں مصنوعی ذہانت کے استعمال کو بڑھانے کی جانب اہم قدم ہوگا۔