یو اے ای سے کسی ملک یا فرقے کے افراد کی بے دخلی کی خبریں جھوٹ ہیں، وزارت داخلہ

وفاقی وزارت داخلہ نے سوشل میڈیا پر پھیلنے والی ان خبروں کی سختی سے تردید کی ہے جن میں دعویٰ کیا جا رہا تھا کہ متحدہ عرب امارات (یو اے ای) میں کسی خاص ملک یا فرقے سے تعلق رکھنے والے افراد کو اجتماعی طور پر ملک بدر کیا جا رہا ہے۔

اسلام آباد سے جاری سرکاری بیان میں کہا گیا ہے کہ وزارت داخلہ نے اس معاملے کا نوٹس لیا ہے۔ واضح کیا گیا ہے کہ یو اے ای میں کسی مخصوص قوم یا فرقے کے خلاف کوئی ڈی پورٹیشن مہم نہیں چل رہی۔ وہاں قوانین کی خلاف ورزی کرنے والے افراد کے خلاف ہی کارروائی کی جاتی ہے۔

بیان کے مطابق بے دخلی صرف اسی صورت میں ہوتی ہے جب کوئی شخص ویزا قوانین کی خلاف ورزی کرے یا غیر قانونی دستاویزات استعمال کرے۔ اس کے علاوہ کسی بھی بنیاد پر اجتماعی کارروائی کی کوئی پالیسی موجود نہیں ہے۔

وزارت داخلہ نے کہا ہے کہ سوشل میڈیا پر ایسی جھوٹی خبریں بعض عناصر جان بوجھ کر پھیلا رہے ہیں تاکہ غلط فہمی پیدا کی جا سکے۔ اس طرح کی معلومات نہ صرف عوام کو گمراہ کرتی ہیں بلکہ دوطرفہ تعلقات پر بھی منفی اثر ڈال سکتی ہیں۔

حکومت نے واضح کیا کہ پاکستانی شہری بدستور یو اے ای اور دیگر دوست ممالک میں ورک ویزا حاصل کر رہے ہیں۔ کسی قسم کی پابندی یا امتیازی سلوک کی خبریں درست نہیں ہیں۔