تیز ہواؤں اور گرج چمک کے ساتھ بارشیں ہی بارشیں؛ محکمہ موسمیات نے بڑی پیشگوئی کردی

محکمہ موسمیات نے ملک کے مختلف علاقوں میں آئندہ دنوں کے دوران موسم کی صورتحال کے حوالے سے تازہ پیشگوئی جاری کر دی ہے۔

 رپورٹ کے مطابق کئی علاقوں میں تیز ہوائیں چلنے اور گرج چمک کے ساتھ بارش ہونے کا امکان ہے۔ کچھ مقامات پر موسم خوشگوار جبکہ کچھ علاقوں میں گرمی اور حبس برقرار رہنے کی توقع ہے۔

خیبرپختونخوا کے مختلف اضلاع میں بارش کے امکانات ظاہر کیے گئے ہیں۔ دیر، چترال، مالاکنڈ، کوہستان اور بونیر میں تیز ہواؤں کے ساتھ بارش ہو سکتی ہے۔

 مالم جبہ، کالام، پارا چنار اور ایبٹ آباد میں بھی چند مقامات پر بارش کی پیشگوئی کی گئی ہے۔ پہاڑی علاقوں میں بارش کے باعث موسم خوشگوار ہونے کا امکان ہے۔گزشتہ 24 گھنٹوں کے دوران مالم جبہ میں سب سے زیادہ 67 ملی میٹر بارش ریکارڈ کی گئی۔

 محکمہ موسمیات اور متعلقہ اداروں نے شہریوں کو خراب موسم کے دوران احتیاط برتنے اور غیر ضروری سفر سے گریز کرنے کی ہدایت دی ہے۔

لاہور میں بھی آئندہ دنوں کے دوران مزید بارشوں کا امکان ظاہر کیا گیا ہے۔ بارش کے باعث موسم نسبتاً بہتر ہو سکتا ہے، تاہم وقفے وقفے سے بادل چھائے رہنے کی توقع ہے۔

دوسری طرف کراچی میں گرمی کی شدت بدستور برقرار ہے۔ شہر میں حبس کی کیفیت بھی محسوس کی جا رہی ہے۔ محکمہ موسمیات کے مطابق آج درجہ حرارت 38 ڈگری سینٹی گریڈ تک جانے کا امکان ہے۔

اسلام آباد میں آج موسم گرم اور خشک رہنے کی پیشگوئی کی گئی ہے۔ ملک کے جنوبی حصوں میں بھی زیادہ تر علاقوں میں موسم گرم اور خشک رہنے کا امکان ظاہر کیا گیا ہے۔