فیصلہ بھارت کو کرنا ہے کہ وہ اپنی جغرافیائی حیثیت برقرار رکھنا چاہتا ہے یا نہیں، صدارتی ترجمان

ترجمان ایوان صدر نے بھارتی آرمی چیف کے پاکستان مخالف اور اشتعال انگیز بیان پر کڑا ردعمل دیتے ہوئے کہا ہے کہ اب فیصلہ نئی دہلی کو کرنا ہے کہ آیا وہ اپنی موجودہ جغرافیائی حیثیت برقرار رکھنا چاہتا ہے یا نہیں۔

ایوان صدر کے ترجمان مرتضیٰ سولنگی نے پڑوسی ملک بھارت کی عسکری قیادت اور مودی سرکار کی جانب سے دی جانے والی حالیہ گیدڑ بھبکیوں اور غیر ذمہ دارانہ جنگی بیانات پر سخت ترین سفارتی ردعمل کا اظہار کیا ہے۔

اسلام آباد سے جاری ہونے والے ایک تیکھے اور جامع بیان میں صدارتی ترجمان نے بھارتی آرمی چیف کے اشتعال انگیز ریمارکس کو آڑے ہاتھوں لیتے ہوئے کہا کہ اب یہ فیصلہ خود نئی دہلی کے حکمرانوں اور وہاں کی عسکری قیادت کو کرنا ہے کہ آیا وہ عالمی نقشے پر اپنی موجودہ جغرافیائی حیثیت برقرار رکھنا چاہتے ہیں یا اسے ہمیشہ کے لیے گنوانا چاہتے ہیں۔

انہوں نے بھارت کو سخت الفاظ میں تنبیہ کی کہ وہ پاکستان کو تاریخ کا درس دینا فوری طور پر بند کرے کیونکہ تاریخ کے اوراق گواہ ہیں کہ کس نے کس وقت کیا سبق سیکھا ہے۔

یہ بھی پڑھیں : ایٹمی ہمسائے کو جغرافیے سے مٹانے کی دھمکی بھارتی قیادت کا ذہنی دیوالیہ پن ہے، پاک فوج

مرتضیٰ سولنگی نے بھارت کے اندرونی حالات اور خطے میں اس کے توسیع پسندانہ عزائم کو بے نقاب کرتے ہوئے کہا کہ اپنے تمام ہمسایوں سے بلاوجہ کے جھگڑے مول لینے اور اپنے ملک کے اندر بسنے والی مجبور اقلیتوں کو ریاستی جبر کے ذریعے دیوار سے لگانے کی جنونی پالیسیوں کے نتیجے میں بھارت خود اپنے ہی ہاتھوں اپنی جغرافیائی شکل کھو دے گا اور اندرونی خلفشار کا شکار ہو کر بکھر جائے گا۔

صدارتی ترجمان نے فخر کے ساتھ پاکستان کی تاریخی جڑوں کا ذکر کرتے ہوئے واضح کیا کہ ہماری تاریخ کسی عارضی نظریے کی محتاج نہیں بلکہ یہ موئنجودڑو، مہرگڑھ اور ٹیکسلا جیسی دنیا کی قدیم اور عظیم ترین تہذیبوں تک پھیلی ہوئی ہے، ہماری جڑیں زمین میں انتہائی گہری ہیں اور ہمارا مستقبل بحیثیت قوم انتہائی روشن اور پائیدار ہے۔

انہوں نے مزید کہا کہ موجودہ انتہا پسند بھارتی حکومت کی تنگ نظر پالیسیاں اس بات کا واضح ثبوت ہیں کہ وہ موجودہ سائنسی اور ترقی یافتہ دور میں آگے بڑھنے کے بجائے صرف ماضی کے اکھڑے مردوں میں جی رہی ہے اور نفرت کی سیاست کر رہی ہے۔ حقیقت یہ ہے کہ موجودہ بھارتی قیادت کے پاس آنے والے کل کے لیے کوئی تعمیری وژن موجود نہیں ہے اور وہ اپنی اسی اندھی سوچ کے باعث پورے جنوبی ایشیا کے امن کو داؤ پر لگا رہی ہے۔